Забранети концертите во црквата „Св. Софија“
Проблемот е во нерешените односи меѓу Министерството за култура и Дебарско-кичевската епархија
„Министерството за култура и Дебарско-кичевската епархија, под која спаѓа охридската црква ’Св. Софија‘, се уште ги немаат регулирано своите односи. Концерти во црквата во рамките на ’Охридско лето‘ имало и ќе има, но откако ќе се решат односите меѓу двете институции“. Ова беше кусиот одговор на портпаролот на Синодот на МПЦ, Тимотеј, во врска со завчерашната забрана во црквата „Св. Софија“ да се одржуваат концертите кои се дел од програмата на „Охридско лето“.
Завчера, квартетот флејти „Сиринкс“ требаше да настапува во црквата „Св. Софија“, но од надлежните лица на црквата на членовите на ансамблот им било кажано дека не смеат да настапуваат внатре, туку само надвор. Иако не најавен, концертот се одржа пред храмот на „Св. Софија“.
Селекторката за музика на „Охридско лето“, Гордана Јосифова-Неделковска, вели дека не е информирана за овој проблем, дека техничките работи не се во нејзина надлежност.
Флејтистката Будимка Имери, која е член на квартетот „Сиринкс“, вели дека за тоа дека не можат да настапуваат внатре им кажале непосредно пред концертот. „Пред самиот концерт ни кажаа дека нема да свириме во ’Св. Софија, дека имало некаква забрана од црквата, дека е тоа спор кој го има фестивалот неколку години со црквата. Тоа беше за нас стресно, зашто во последен момент не известија, а ние сме квартет, помал камерен состав и предворјето на црквата не е најсоодветен простор за одржување на концерти, зашто се губи звукот и не можеме да се слушаме меѓу себе. Сепак, среќни сме што одржавме концерт“, вели Имери.
Директорот на „Охридско лето“, Тони Симоновски пак, рече дека го префрлиле концертот во предворјето зашто бил најавен голем интерес, односно 50-ина странци купиле билети, па просторот во внатрешноста бил претесен да ги собере сите заинтересирани. Тој вели дека до нивната Дирекција не стигнало никакво соопштение за забрана за концерти и дека не постои никаков проблем.
Сепак, проблемот најверојатно лежи кај Министерството за култура, под чија капа спаѓа фестивалот „Охридско лето“, а единствената причина да не се одржуваат концерти во црквата „Св. Софија“ се нерегулираните финансиски сметки. Односно, Министерството ги нема платено средствата за откупување на просторот. Од Министерството за култура пак, велат дека тие односи треба да ги средат самите организатори на „Охридско лето“.
Следниот концерт на „Охридско лето“ во црквата „Св. Софија“ е утре, кога треба да настапи познатиот руски виолинист, Валериј Ојстрах. Организаторите сеуште не знаат дали ќе може концертот да се одржи внатре. Фестивалот „Охридско лето“ почна токму во црквата „Св. Софија“ со концертот на оперската певица Ана Липша-Тофовиќ пред 49 години, и оттогаш во преубавиот амбиент на храмот со одлична акустика концертирале голем број на врвни музички имиња и ансамбли од светот. (Т.И.)
|
