Претходен број

Црвенковски ја средува партијата и исчезна од јавноста

Од лидерот на СДСМ не слушнавме пораки дека тие се алтернатива за излез од економската криза

Билјана Јовановска

Изминативе два месеца е забележливо отсуството на Бранко Црвенковски, лидерот на Социјалдемократскиот сојуз на Македонија, од политичката сцена. Прво како да го затече неподготвен идејата на Тито Петковски за формирање на владата на национален спас, а не се огласи ниту минатата недела која беше прилично драматична за партијата на власт, ама и за иднината на државата. Црвенковски одбра да не излезе во јавноста и од политичарот со богато искуство не слушнавме сериозни пораки дека тој и неговата партија се вистинска алтернатива за излез од тешките кризи низ кои поминува државата и на економски и на политички план. Практично, Црвенковски со Груевски не се конфронтирал од заминувањето од претседателската функција, така што овој молк од најголемата опозициска партија дури и за нивните приврзаници е малку зачудувачки.

Но, Црвенковски очигледно е фокусиран на средувањето на внатрепартиските состојби на општинско ниво и се тврди дека 30 општински организации веќе добија нови раководства. На пат е без малку секој ден, некаде промените и не одат лесно, па искусниот лидер работите ги „пегла“ на самото место. Како што велат партиски извори, нема да биде одмината ниту една општинска организација за наесен СДСМ целосно да биде освежен со нови кадри и консолидирана.

Истовремено, тимови експерти од различни области ја изработуваат партиската програма во која акцентот ќе биде ставен на економскиот дел и сето тоа треба да биде завршено до почетокот на септември. Тогаш се очекуваат и посериозни промени во младината на СДСМ, која, практично, остана нечепната во бранот промени што ги направи Црвенковски по враќањето на „Бихаќска“, а се најавува дека партијата ќе добие и нов портпарол. Истовремено, ќе се промовира и Советот за надворешна политика, за кој се говореше дека ќе го предводи проф. Љубомир Фрчкоски. Со тоа партијата ќе потврди дека стратегиските планови, сепак, им се доверени на поискусните, иако ангажманот на некои млади во СДСМ воопшто не е занемарлив. Меѓутоа, факт е дека освен ретките појавувања на новите партиски ��отпретседатели, јавноста се' уште немаше можност да ги слушне другите нови партиски лица.

Се најавува дека од есен СДСМ ќе промовира и поинаков однос спрема јавноста и ќе ја смени установената перцепција дека е тоа партијата на самобендисани интелектуалци кои немаат допир со секојдневието на граѓаните, со проблемите што ги мачат.

Зоран Заев, потпретседателот на СДСМ, вели дека интензивно се работи на економската програма, во чија изработка се вклучени два главни тима и неколку поттимови.

„Иако конечно решение за економскиот развој на државата ќе има кога ќе станеме дел од колективните системи, сепак, и дотогаш мора да имаме решенија кои ќе значат вкупен економски развој, но над се' ќе бидат и конкретни решенија за секое домаќинство“, вели во изјавата за „Утрински весник“ доскорешниот в.д. лидер на СДСМ. Особено им е важно оние решенија што ќе ги дадат да бидат реално спроведливи и тоа во услови на криза во која е државата, согласно со потенцијалите и ресурсите со кои располага Македонија. „Решенијата што ќе ги понудиме не се изборна програма, туку претставуваат визија за економската иднина на државата и треба да бидат своевидна најава пред граѓаните, а дури подоцна ќе бидат преточени и во изборна програма за идните парламентарни избори, без оглед кога ќе се одржат“, нагласува Заев.

Според партискиот потпретседател. ангажирани се голем број експерти, но во изготвувањето на програмата СДСМ се потпира и на практични решенија што произлегуваат од бизнис-секторот, а кои ќе треба да го решат проблемот со невработеноста. Наедно, тие ќе подразбираат и поттикнување нови инвестиции. „Целосно се разработува и макроекономската политика, која ќе понуди сосема нов концепт – стабилно развоен наспроти овој што го имаме, а кој претставува своевидна фурија со премногу ризици што ги чувствуваат граѓаните“, објаснува Заев.