Тројца Нигеријци се фатени на скопскиот аеродром при обид со фалсификувани патни исправи да влезат во земјава. Полицијата на О.Б.И. (34), државјанин на Нигерија, му поднесе кривична пријава за шверцување мигранти, бидејќи се обидел двајцата Нигеријци, преку Македонија и Грција, да ги прошверцува во некоја западна земја.

Тројцата се фатени при пасошка контрола на аеродромот „Александар Велики“ со фалсификувани патни исправи, при што е спречено да се воспостави меѓународен канал на шверцување мигранти од Нигерија преку Турција и Македонија до Грција, а оттаму како крајна дестинација некоја западна земја. Организаторот преку посредници стапил во контакт со двајцата нигериски државјани, О.А. (26) и Н.М.Е. (30), кои сакале да ја напуштат земјата. Тој обезбедил фалсификувани покани, за учество на саемот за земјоделство што треба да се одржи во Скопје, а во овие покани биле внесени и имињата на мигрантите.

Но, при пасошката контрола во Скопје надлежните ги откриле фалсификуваните пасоши, а при проверката на нивниот багаж им ги пронашле и оригиналните патни исправи што ги поседувале. На организаторот му е одреден притвор од 30 дена, а мигрантите се депортирани од земјава. (Х.Р.)