Претходен број

ЕДИТОРИЈАЛ

Патриотска оставка за патриотскиот гаф

Нина Нинеска-Фиданоска

Не толку одамна, „Утрински“ на истото ова место во весникот праша - кој се „омрси“ од фискалните патриоти? Поточно, живо се интересиравме како и по чии џебови се распределија оние пет милиони евра кои недолжните трговци мораа да ги плаќаат за да го задоволат владиниот каприц да изигрува голем патриот. Тогаш поставивме уште едно прашање - кој ќе ја сноси одговорноста ако овој „патриотски“ владин проект падне на Уставен суд, како што и предупредуваа речиси сите правни експерти?

Сега, неколку месеци подоцна, многу похрабро, пак ќе прашаме - кој ќе си поднесе оставка? Дали тоа ќе биде министерот за финансии, вицепремиерот за економски прашања или некој трет, нека одлучат самите. Како што власта знаеше да им се заканува и да ги плаши трговците за да ги вградат патриотските софтвери, сега треба итно да одговори - кој ќе ја плати штетата? Ама тоа да не биде од буџетски пари и сите да плаќаме за туѓи грешки, туку „господинот одговорен“ да си плати од свој џеб. Само така нашиот арогантен владин естаблишмент ќе сфати дека мора да ги сноси последиците од своите пропусти.

Како врв на владиниот невкус прозвучи вчерашната изјава на министерот за финансии Трајко Славески, кој како да си играше мајтап со дуќанџиите. Фактот што тие потрошија по 200 евра за да ги надградат фискалните апарати со патриотски софтвер за него воопшто не бил страшен, бидејќи „касите и онака им биле стари, па крајно време било да ги заменат“. ВМРО-ДПМНЕ, пак, отиде дотаму што за неуспехот на фискалните патриоти го обвини претседателот Бранко Црвенковски, кој „имал влијание врз Уставниот суд“. Се' бисер до бисер.

Сега најмалку што се очекува од власта е барем да не направи нова глупост и повторно да ги „закрпи“ трговците со нов арч. Одлуката на Уставниот суд единствено налага касите да се вратат во првобитната положба, а не прецизира кој ќе ги сно��и новите трошоци за отстранување на патриотскиот софтвер. Владата мораше веднаш да соопшти дека нема да дозволи дуќанџиите пак да плаќаат од свој џеб за нејзините каприци. И не само тоа, туку треба „машки“ да објави дека ќе им ги врати парите на дуќанџиите, што летото безмилосно им ги извлече, заканувајќи им се со драконски казни од 4 до 5 илјади евра.

И наместо да излезе со соодветна реакција, првиот финансиер вчера само кажа дека Владата официјално не ја добила одлуката на Уставниот суд. Кога „написмено“ ќе била информирана, ќе се состанела и ќе заземела став. Е, од овој коментар многу им олесна на трговците! Само уште повеќе се збунија од дрскиот настап на министерот.

Најновиот владин дебакл не е прв случај тимот на Груевски да доживее да му падне одлука на Уставен суд. Зошто - затоа што од самобендисаност или кој знае од каков друг мотив едноставно не сака да слуша добронамерни совети. Сите можни македонски правници, меѓународни институции, невладини организации, бизнисмени, па дури и една од коморите, која традиционално важи за поддржувач на оваа власт, на цел глас апелираа и просто ја молеа да се повлече од намерата за фискален патриотизам. Но, Владата е невозможно упорна и осилена и кога нешто ќе си зацрта, за неа не важат никакви сугестии. Таа ја туркаше својата идеја и по цена што измалтретира многу трговци, кои изгубија и пари и време и нерви за да ги задоволат нејзините желби. Не може да се владее само со штитење одредени структури во државата, а сите останати да страдаат.

Веќе поминува времето кога граѓаните и бизнисмените ќе го трпат ова своеволно владеење, кое не прифаќа критика и друго мислење. Тоа е раководење без скрупули, без чувство за реалност и без чувство за почитување закони. Ова досега е најсилната порака до Груевски дека со закани и страв не се владее. Или навреме ќе ја разбере или неговиот рејтинг ќе почне брзо да паѓа како што и брзо се ѕидаше.