Бирото за лекови, сепак, одлучи да го повлече зелениот рецепт
Розовите рецепти ќе важат за сите лекови на приватно
Јасмина Јовановска
Министерството за здравство уште не заживеан во практиката ќе го повлече од употреба зелениот рецепт за лековите кои содржат опојни дроги, како дел од новите рецепти во боја наменети за лекови на приватно. Ова значи дека ќе има само два вида рецепти, со што сите лекови кои ќе ги купуваат пациентите, лекарите ќе ги препишуваат на розови рецепти, без разлика на нивната дијагноза, а лековите на товар на Фондот за здравствено осигурување и натаму ќе се издаваат, како и досега на бели рецепти. Со новиот правилник, освен тоа што ќе се воведе ред во издавање на фондовските и на приватните лекови, како што велат во Бирото за лекови, покрај матичните лекари, лекови ќе може да препишуваат и други лиценцирани лекари во државата. Така, рецепти ќе може да препишуваат и стоматолози, лекарите во итната медицинска помош, специјалистите и другите лекари во секундарната и терцијарната здравствена заштита.
Зелениот рецепт да се повлече од употреба само еден ден по неговата примена, Бирото за лекови донесе одлука на итно свиканиот состанок со лекарите, фармацевтите, невладиниот сектор и Агенцијата за заштита на лични податоци, инициран по реакциите дека со рецептите во боја се нарушува приватноста на пациентите. Со поништувањето на зелениот рецепт, Бирото за лекови на некој начин ја призна грешката.Розовите рецепти во практиката ќе заживеат по измена на Правилникот, што ќе биде направена брзо, најавуваат од Бирото за лекови и уште денеска се очекува да се објави во „Службен весник“. За измените во Правилникот, како што велат во Бирото за лекови, ќе биде испратен допис до сите матични лекари
Иако од Бирото за лекови најавија дека правилникот за рецептите во боја ќе биде даден на јавна расправа, вчерашната средба се одржа зад затворени врати. Состанокот, како што дознавам,е бил конструктивен и по укажувања дека со зелените рецепти се нарушува приватноста на пациентите, директорот на Бирото за лекови, Илчо Захарив, се повлекол. Иако, тој се повикал на некаква конвенција за рецептите, сепак, на крај, според неофицијални извори, се решил да го повлече спорниот рецепт, без да даде објаснување зошто пред да се донесат рецептите во боја не било побарано мислење за заштита на личните податоци.
„ Постигнавме согласност и Правилникот ќе биде изменет. Добро е што проблемот брзо се реши по нашето укажување и реакциите од здруженијата за правата на пациентите“, вели директорот на Агенцијата за заштита на лични податоци, Мирјана Марушиќ.
За измените во Правилникот, како што велат во Бирото за лекови, ќе биде испратен допис до сите матични лекари. На рецептот со бела боја ќе можат да се препишуваат 911 лека, кои се на Позитивната листа на лекови, додека на розовиот рецепт ќе се пропишуваат 2.001 лек, што пациентите самите ги плаќаат во целост. |
