„Алфите“ натепале малолетник, граѓаните поставија барикади

Со поставување контејнери, поголема група граѓани вчера го блокираа движењето на сообраќајот по булеварот „Крсте Мисирков“ што води до скопски Бит-пазар. На инцидентот што се случи вчера попладне петнаесетина минути пред 14 часот му претходела полициска акција за да се спречи продажба на петарди и други пиротехнички средства.

Од МВР потврдија дека се изведувале планирани мерки и активности, но полицајците биле спречувани во својата работа. Потоа булеварот бил блокиран со поставување контејнери. Во инцидентот било оштетено и едно службено возило на полицијата.

„Полицијата приведе малолетно лице на возраст од 16 години поради сомнеж дека препродавало пиротехнички материјали. Станува збор за малолетникот Ј.Ј., а се утврдува идентитетот и на оние лице кои освен што се занимавале со продажба на пиротехника, учествувале и во оштетување на полициското возило“, велат од Министерството за внатрешни работи.

За разлика од полицијата, граѓаните, кои во времето на инцидентот биле во близина на Бит-пазар, имаат сосема спротивно видување за вчерашните случувања. Така, според некои очевидци, се' почнало кога припадник на единицата „Алфи“ извадил автоматска пушка и со неа почнал да го удира малолетникот.

„Видов како еден со ’калашников’ го влече внук ми по асфалт. Го удираше со кундакот од пушката, а потоа му ја ставаше цевката во уста. Сето она што потоа се случи беше само револт на оние кои во тоа време се најдоа на самото место“, вели за „Утрински весник“ роднина на момчето кој сакаше да остане анонимен. Непосредно по инцидентот кај Бит-пазар се појави и таткото на тепаното момче. Во групата која остана на местото каде што се случи инцидентот имаше и такви кои во случајот препознаа политичка заднина, но и такви што сметаат дека пазарот не треба да биде место за пресметки. (Љ.С.)