Мурињо: Во Реал ќе нема ѕвезди

Дојдов, видов, победив, краток би бил описот на двегодишната авантура на Жозе Мурињо во милански Интер. Освои се што можеше да се освои и по последниот свиреж на „Сантијаго Бернабе“ со своето ладнокрвно лице покажа дека никој ништо не му може. Иако, на Португалецот му остана уште една година од договорот, останувањето за него не би имало смисла. Сите веќе зборуваат дека Жозе е нов тренер на Реал. „Мотивацијата ќе ја побарам некаде на друго место. Сакам да бидам прв тренер кој ќе ја освои ЛШ со три различни клуба. Да се игра со Барса во Шпанија? Би било тоа голем предизвик“, призна Мурињо и додаде: „На фудбалерите на Реал им порачувам дека доколку станам нивни тренер нема да има ѕвезди. Ѕвезда нема да бидам ниту јас, туку тимот. Ако тоа сите го прифатат, како што го прифатија во Порто, Челзи и Интер, победите сигурно ќе дојдат“, самоуверено изјави Мурињо за португалската ТВ1.

Неговиот агент Жорге Мендес веќе разговараше со челниците на Реал и според шпанските весници работата е блиску до реализација. „Ас„ и „Марка“ тврдат дека Мурињо годишно ќе заработува по десет милиони евра.