Ватерполистите во тешка група на ЕП

Македонија со Србија, Унгарија, Германија, Русија и со Грција

Роберт Димитриевски

Србија, Унгарија, Германија, Русија и Грција ќе и' бидат противници на македонската ватерполо репрезентација во рамките на групата Б на 29. Европско првенство што ќе се одржи во Загреб од 29 август до 11 септември. Ждрепката извршена на плоштадот „Бан Јелачиќ“ во групата А ги смести Црна Гора, Хрватска, Италија, Романија, Шпанија и Турција.

Избраниците на селекторот Стеван Нонковиќ ќе стартуваат на 29 август од 18,45 ч. против Русите, а наредниот ден од 9,30 ч. ќе ги одмерат силите со Грците. Следува слободен ден, па на 1 септември од 16,45 ч. е дуелот со Германците. Повторно слободен, па на 3 септември средбата со Србите од 11,15 ч., нов слободен ден и на 5 септември од 18,45 ч. е мечот со Унгарците.

Токму 12-кратниот европски шампион Унгарија е единствената селекција со која Македонија се нема сретнато никогаш. Најмногу мечеви македонските ватерполисти имаат одиграно со Русија, вкупно пет, при што имаат забележано по една победа и нерешено и три пораза. Единствената победа е 13:11 по продолженијата во разигрувањето за пласман од 7 до 10 место на Европското првенство 2008 во Малага, каде што падна и ремито 9:9 во групата од прелиминарната фаза. На квалификацискиот турнир во Братислава 2007 за ОИ во Пекинг беше 9:7 за Русите, кои славеа со 10:8 и на квалификацискиот турнир во Скопје 2008 за ЕП во Малага, а во јануари повторно во Скопје „зборнаја“ победи со 4:3 во натпревар од Светската лига.

Грците ги совладавме со 7:6 на Олимписки во Светската лига, претходно загубивме со 8:6 во Пиреја, а потоа и со 11:5 на неодамнешниот квалификациски турнир во Волос за ова ЕП. Со Германците, пак, се' сами порази - 8:13 во Братислава, 5:7 во Малага и 4:9 на олимписките квалификации во Орадеа 2008. Од Србите во Малага бевме декласирани со 23:6 во единствениот меѓусебен дуел досега.

Македонија на претходното ЕП го освои осмото место, а на ланското СП во Рим беше 14.