Лазаров најдобар играч на „Супер глоуб“

Кирил Лазаров е прогласен за најдобар играч на светското клупско првенство во ракомет „Супер глоуб“ што се одржа во Доха од 17 до 21 мај. Зајмениот играч од Кроација осигурање Загреб го освои второто место и со катарски Ал Сад и на листата на стрелците. Признанието за МВП го заслужи со постигнатите по 12 гола на три натпревара, вклучувајќи го и финалето со Сиудад Реал, кој славеше со 30:25 и го одбрани трофејот од 2007 година. На десниот бек и капитен на македонската репрезентација за само еден погодок му побегна и признанието за прв голгетер на турнирот, кое му припадна на Египќанецот Ахмед ал Амр од Замалек со 41 гол. Арпад Штербик од Сиудад Реал е избран за најдобар голман.

Како и на мечевите со либански Ал Сад во групата и со Замалек во полуфиналето, Лазаров со дузина погодоци го почести и актуелниот европски првак во финалната средба одиграна пред 3.000 гледачи во катарската престолнина. Најдобриот македонски ракометар имаше реализација од 75 проценти (12/16), седмерците ги изведе беспрекорно (6/6), додаде три асистенции и загуби пет топки.

Ал Сад, кој покрај со Лазаров за ова натпреварување се засили и со Ивано Балиќ, со Мирко Алиловиќ, со Ратко Николиќ и со Ларс Јоргенсен, а од клупата го водеше Веселин Вујовиќ, долго му даваше жесток отпор на еден од најдобрите светски клубови. Лазаров во 19 мин. го одведе својот тим до плус два (8:6).

Третото место на „Супер глоуб“ го освои Замалек со победата од 33:22 над либански Ал Сад во малото финале. Петти е Унопар од Бразил, кој го декласира Саудерн старс од Австралија со 31:16. (Р.Д.)