Првакот Англија почна со победа

Англичанките со победа од 3:1 против Шкотска ја почнаа одбраната на титулата на 9. Европско првенство за фудбалерки до 19 години што вчера почна во Македонија. Германија во рамките на истата група А ја совлада Италија со 4:1. На стартот од групата Б Холандија славеше против Франција со 2:0, а по синоќешното свечено отворање на националната арена „Филип Втори Македонски“ во Скопје избраничките на селекторот Добрислав Димовски требаше да играат со Шпанија.

Во второто коло в четврток ќе играат Шпанија - Франција и Македонија - Холандија во групата Б и Шкотска - Германија и Англија - Италија во групата А.

ЕП се игра од 24 мај до 5 јуни на три стадиони во главниот град („Филип Втори“, „Борис Трајковски“ во Маџари и „Железарница“ во Автокоманда) и во Куманово („Милано арена“).