Александра Јосифоска како четврта носителка ќе стартува на тенискиот турнир во Брчко, Босна и Херцеговина, кој неделава се игра на земјени терени и за награден фонд од 10.000 американски долари. На најновата ВТА-листа најдобрата македонска тенисерка е 575. во сингл, односно пет места подолу од минатата седмица.

Четворица македонски тенисери, пак, преку квалификациите се обидуваат да стигнат до главниот турнир на фјучерсот во бугарскиот град Добрич (земја, 10.000 долари). Томислав Јотовски, кој од вчера е 1821. на АТП-листата, како 11. носител го загуби решавачкиот дуел со шестиот носител Влад Стефан (1656.) од Романија со 6-1, 1-6, 7-5. До третото и последно квалификациско коло стигнаа и вториот носител Димитар Грабулоски (1087.) и четвртиот Шендрит Деари (1596.), а Васко Здравкин беше запрен на втората пречка. (Р.Д.)