Вели Мумин, по обичај, ќе биде најголемиот адут за висок пласман во четиричлената македонска репрезентација на 15. Светско првенство во бокс што од денеска до 13 септември ќе се одржи во Милано. Освојувачот на бронзените медали од еврошампионатите во Пловдив 2006 и во Ливепрул 2008 ќе настапи во категоријата до 51 кг. Негов најголем успех на мундијалите е петтото место од Тајланд 2003.

Мумин и Примислав Димовски, кој ќе боксува во најтешката категорија (над 91 кг), се подготвуваа во миланскиот камп на светската боксерска федерација АИБА. Македонија на ова СП ќе ја претставуваат и Фатлум Жута (74 кг) и Димитар Ташков (91 кг).

На првенството во Италија ќе настапат околу 650 боксери од 140 земји, кои ќе се натпреваруваат во 11 тежински категории. Од следното СП во Јужна Кореја по две години ќе има една категорија помалку.