„Сони“

Вокменот замина во техноисторијата

Откако во март ја испрати во пензија флопи-дискетата, електронскиот џин „Сони“ го запре производството и дистрибуцијата на уште една сега веќе застарена технологија - вокменот на аудиокасети. Вокменот на „Сони“ беше првиот преносен свирач на музика, кој поради својата цена му беше достапен на просечниот купувач. Според пишувањето на „Ај-Ти медија“, последната пратка на вокмени во дуќаните е пристигната во април, а откако ќе се продадат тие примероци, веќе нема да може да се набават.

Првата генерација вокмени е пуштена во продажба на 1 јули 1979 година. Иако подоцна постигна голем успех, вокменот на „Сони“ во првиот месец беше продаден во само 3.000 примероци. Во текот на својата 30-годишна кариера, вокменот заврши во рацете на повеќе од 200 милиони среќни корисници.

Најавата за престанување на производството на вокменот дојде само еден ден пред деветата годишнина на ај-подот на пазарот. „Смртта“ на вокменот ја предизвика големата побарувачка за преносни ЦД-плеери во текот на деведесеттите години на минатиот век.