Стразбур го опомена Борисов за Македонците

Стразбур - Комесарот за човекови права на Советот на Европа, Томас Хамарберг, побара од бугарскиот премиер Бојко Борисов да ги почитува правата на националните и религиозните малцинства, а особено на македонското. Ваквото барање го испорача со писмо, во кое „итно бара од бугарските власти да се грижат за целосно и ефективно почитување на правата и слободите на македонското малцинство, посебно нивното право на слободно здружување и мирно собирање“.

Притоа, Хамарберг ги потсетува властите на Бугарија „дека правото на определување на едно малцинство претставува главен принцип врз кој треба да се темели секое демократско плуралистичко општество и овој принцип треба ефективно да биде спроведен за сите малцинства без разлика дали тие се национални, религиозни или јазични“.

Одговорот на бугарскиот премиер до Хамарберг, упатен на 3 ноември, е дека за случајот со ОМО „Илинден“ „бугарските власти ги спровеле на дело сите општи мерки што биле потребни, вклучувајќи промена на Законот за собири, митинзи и демонстрации, со што Бугарија се ставила во согласност со Европската конвенција за човекови права“.

Борисов притоа тврди дека деталните информации што биле доставени за јавните настани организирани од ОМО „Илинден“ и ОМО „Илинден - Пирин“ во последниве две години, „јасно даваат до знаење дека овие здруженија го уживаат правото на слободно собирање во согласност со законот што се спроведува“. Борисов, исто така, тврди дека за реализацијата на општествените и културните активности ОМО „Илинден“ и ОМО „Илинден - Пирин“ добивале поддршка од бугарските власти. (Н.Р.)