ЕДИТОРИЈАЛ

Државата влезе во „Космос“

Билјана Ангеловска

И „Космос“ имал крај. Не се покажа доволно моќен да и' одолее на државната машинерија подготвена да се справи со она што е изградено на незаконски начин. Луксузниот станбено-деловен комплекс во Скопје, на самиот брег на Вардар, е разнишан. Во буквална смисла на зборот, физички. Но, и во секоја друга. Државата влезе во „Космос“ и веќе се слушна звукот на чеканот. Не дека некој очекува целиот објект да биде урнат, впрочем, за такво нешто нема ниту оправдување, но дека комплексот ќе биде „обележан“ е повеќе од јасно. А, пред се', неговиот инвеститор, пратеникот и бизнисмен Фијат Цаноски.

Скопјани во два наврата веќе го слушаа звукот на чеканот кога удира во бет��нот. Еднаш, кога се уриваше последниот дограден кат на зградата на Љупчо Палевски-Палчо во Дебар Маало, и вториот пат кога се удираше на 80-тината сантиметри кои беа отповеќе изградени на Кинескиот ѕид во Градскиот парк. И тогаш, исто како и сега веројатно, акцијата беше неспорна. Оти, инвеститорот се заборавил, па си ја кренал раката повисоко отколку што треба и доградил, односно надградил неколку метри повеќе од што му било дозволено. За жал, и во тоа време на сите во државава им беше повеќе од јасно дека рушењето има малку врска со градењето, а многу повеќе со политиката.

Сепак, иако државата најави дека со уривањето делови од Кинескиот ѕид ја почнува беспоштедната борба со урбанистичката мафија, оттогаш до сега како премолчено да беше прогласено примирје. Се' до завчера, кога тоа примирје „го прекрши“ инспекцијата. Или можеби самиот инвеститор на „Космос“, Цаноски. Ќе се најдат ли сватовите Цаноски и Рамковски повторно заедно на иста страна на законот? Се разбира, овој пат, на другата. Едниот за финансиски, а другиот за урбанистички малверзации.

Се' би било в ред доколку вистинската причина за завчерашната акција на Градежниот инспекторат придружуван од полициските колеги е преземена исклучиво од градежно-урбанистички мотиви. Зашто, неодминлив е впечатокот дека зад неа има нешто многу повеќе од урбанизам. Односно, дека има многу повеќе политичка пресметка отколку се' друго. Впрочем, ако беше поинаку, ова ќе се случуваше многу порано. Или, што е поверојатно, воопшто немаше да се случи.

Некако тешко е да се поверува дека инспекциската акција е чисто градежна. Та, нели неправилностите биле забележани уште во мај? И, тоа токму кога веќе беше јасно дека ќе има избори? Иако габаритот на објектот е видлив со месеци наназад, досега изградбата течеше без никакви проблеми. Барем навидум.

Факт е дека се' додека Цаноски со неговата партија беше коалициски партнер на ВМРО-ДПМНЕ, не му фалеше влакно. Иако требаше да му биде јасно што може да го снајде ако ја смени страната. Судбината на неговиот сват Велија Рамковски требаше да му биде опомена.

Но, Цаноски очигледно не ја научи лекцијата. Или не сакаше. Сега, тој е во опозиција и очигледно таквиот политички трансфер скапо ќе го чини. Од друга страна, тој му е сват на Рамковски. И оваа роднинска врска скапо ќе го чини. Особено што се' почесто се слуша дека неговиот син, поточно зетот на Велија, ќе ја води А2 телевизија, во која би требало да се претопи штотуку згаснатата А1. Се чини беше само прашање на време кога ќе се случи нешто со луксузниот комплекс „Космос“. Фијат Цаноски сам си влезе во устата на лавот. Ем, ја смени страната ем градел незаконски. Сега ќе мора да ја плати цената.