Пет минути интервју

Кариерата ја градев чекор по чекор

Татјана Стојановска - презентерка

Валентина Тодоровска

Трансферите се вообичаена работа и тоа се практикува секаде, па и во твојата професија. Сепак, како се одлучи за преминеш токму во Канал 5 телевизија и како се снајде во новата средина?

„По А1 телевизија, средина во која би можела професионално да се вклопам беше Канал 5. Станува збор за професионалци, усогласен тим, па во таква добра работна средина не ми беше тешко да се вклопам. Напротив“.

Колку си критична кон себе и кон својата работа? Многу години те гледаме како презентерка, сметаш ли дека имаш реална конкуренција? И што велиш за новите презентерски сили? Кој е с��ветот што им го упатуваш најчесто?

„Се разбира дека ако не си критичен и ако сметаш дека си го достигнал максимумот во работата, никогаш нема да напредуваш на вистински начин. Моето второ јас е самокритика и од оние сум што веруваат и знаат дека секогаш може подобро. Патем, за се' во животот сум таква, не само за работата. Секако дека имам конкуренција и тоа е добро, знам дека тоа е иницијална каписла со која се оди напред. Секој има своја публика. Инаку, има многу квалитетни презентери моментно во македонскиот етер и тоа е добро. Само така можеме да одиме напред и да го градиме имиџот и да го подигнеме квалитетот во нашата професија...“

Твоето телевизиско искуство е над десетина години и имаше среќа да учиш од најдобрите.

„Во етерот сум од 1993 година, а на вести 15 години. Првите 11 години бев во МТВ, а следните седум во А1. Израснав пред камерите и - да, имав голема среќа да учам од професионалци, моите учители се спикерите од МТВ, Благоја Крстевски, Лиле Крстева, Розета Арсова, Славица Станојковска, Ленче Смилевска, луѓе кои несебично го пренесуваа своето знаење и искуство на нас, помладите генерации... Но, во оваа професија растеш и со самата работа и искуството. Среќна сум што одев чекор по чекор и што имав од кого да учам“.

Секогаш си била таинствена, мистична кога е во прашање љубовта. Вљубена ли си? И каков треба да е мажот што би те заинтригирал?

„Приватниот живот сакам да го заштитам од јавноста. Досега мислам дека сум успевала да го сместам во делот што го толкува зборот во вистинска смисла на значењето... Еве ќе кажам дека сум среќна во љубовта“.

Ќе имаш ли можност за кус одмор летово?

„Мислам дека ќе украдам неколку дена за да се одморам покрај море. Но, моментално се дружам со гледачите на Канал 5.