Сметките за струја заглавени кај поштарите

Граѓаните не можат да ги платат сметките навреме, за што ЕВН пресметува камата

Маја Томиќ

„Сметките за струја секој месец доцнат, никогаш не ги добивам навреме.

Најрано што стасале е два-три дена до истекот на предвидениот рок за плаќање, па морам да брзам да ја извршам уплатата зашто останува малку време и ако не побрзам, ЕВН ќе ми се пресмета камата на следната сметка“....

„Во континуитет ги добивам новите сметки неколку дена откако е веќе поминат рокот за уплата и автоматски секој месец плаќам камата за задоцнето плаќање. Не дека е таа многу висока, по неколку денари е, но зошто да ги давам парите ? Не сум виновна што не е дојдена сметката навреме на моја адреса. Што направи вака ЕВН со доставата преку пошта, порано кога инкасатори ги носеа сметките, се' беше некако поорганизирано и многу поредовно“...

Ова се најчестите реакции што можат да се слушнат од граѓаните последниве мес��ци. Односно, откако „ЕВН Македонија“ реши сметките за струја да не ги доставуваат лица од компанијата, туку да го прави тоа „Македонска пошта“. Тоа беше во април годинава кога од ЕВН соопштија дека склучиле договор со „Пошта“ и дека се надеваат на добра соработка со нив.

Но, жалбите од граѓаните до ЕВН се засилија токму од тој период наваму, што значи дека „Пошта“, очигледно, не го положи испитот. Во изминатите месеци се покажа дека тие немаат доволно капацитет навреме да ги испорачуваат сметките за струја, според договореното со ЕВН. Граѓаните забележуваат и дека сметките веќе не им се доставуваат од истите поштари, туку од некои непознати, надворешни лица, кои воопшто не го познаваат теренот за наплата, така што често се случува сметката и воопшто да не стигне на вистинската адреса.

Од „ЕВН Македонија“ немаат официјален коментар за досегашната соработка со „Македонска пошта“. Кратко велат дека се обидуваат секој проблем во нивните меѓусебни односи да го решаваат согласно со склучениот договорот меѓу двете компании.

Сепак, како што дознаваме неофицијално, ЕВН веќе во неколку наврати сериозно реагирала до „Пошта“ поради нивната неажурност и ги покривала колку што можела недостатоците, со тоа што не им пресметуваше камата на граѓаните за дополнителни 14 дена задоцнето плаќање од пропишаниот рок за наплата. Исто така, при крај е и двомесечната кампања на ЕВН за плаќање на нетужените сметки од последната година, при што не се наплатува каматата за задоцнувањето.

Иста така, неофицијално дознаваме дека ЕВН е секојдневно претрупано од жалбите на граѓаните поради доцнењето на сметките и дека веќе сериозно се размислува да се прекине соработката со „Пошта“, доколку и натаму компанијата продолжи да се однесува како и досега.

Од службата за информирање на „Македонска пошта“ велат : „Свесни сме дека во одредени реони има проблеми со доставата на сметките за струја, односно дека се доцни и по неколку дена и граѓаните реагираат поради тоа. Се обидуваме да го решиме проблемот, а имаме формирано и работна група со ЕВН за да се најде соодветно решение. „Македонска пошта“ веќе има испратено барање до Министерството за финансии за вработување на одреден број поштари и се' уште чекаме одговор од нив. Со поголем број лица што ќе ја разнесуваат поштата, односно сметките за електрична енергија, се надеваме дека ќе се надмине оваа досегашна состојба и дека веќе нема да има доцнења во некои подрачја во земјава“.