СДСМ ја тргна рампата од деловникот

СДСМ ќе се врати на координациите во парламентот за да придонесе за поповолен извештај од ЕК

Пратениците од СДСМ ќе се вратат на координациите во парламентот, ќе гласаат за каков било деловник што ќе го предложи ВМРО-ДПМНЕ и ќе се откажат од иницијативата за формирање собраниска комисија за контрола на ревизорските извештаи. На ваков начин најголемата опозициска партија планира да даде придонес за откочување на политичкиот дијалог, како еден од критериумите што треба да се исполнат пред затворањето на годишниот извештај на Европската комисија за Македонија.

„Со ова критериумот за функционален политички дијалог е во целост исполнет и симнат од дневен ред. Таму каде што ние како опозиција можевме да влијаеме - работата е завршена“, изјави вчера лидерот на СДСМ, Бранко Црвенковски.

Делегацијата на ЕУ во Скопје веднаш ја поздрави одлуката на опозицијата, која, пак, за владејачката ВМРО-ДПМНЕ е доказ дека пратеничката група на СДСМ „не размислува, не гласа и не учествува во политичкиот дијалог по свое убедување, туку го прави тоа во согласност со расположението на Црвенковски“.

„Зајакнатиот политички дијалог и усогласувањето во однос на Деловникот ќе ги зголемат ефикасноста и демократскиот капацитет на парламентот, како и општата корист за граѓаните. Ги охрабруваме сите политички партии да работат во духот на консензусот, со цел да се справат со сите отворени прашања“, посочија од делегацијата на ЕУ во Скопје.

Министерот за надворешни работи, Антонио Милошоски, во својство на член на Извршниот комитет на ВМРО ДПМНЕ, на прес-конференција оцени дека Црвенковски се однесувал калкулантски, непродуктивно и политички незрело, бидејќи со мали трикови сакал да изигрува голем политичар.

Премиерот Никола Груевски минатата недела ги критикуваше опозициските пратеници поради бојкотот на собраниските координации, обвинувајќи дека нивна цел е Македонија да не добие позитивен извештај од ЕК. Во меѓувреме, кулминираше и дебатата за тоа дали македонските власти пред 15 години одбиле понуда земјата да влезе во ЕУ како ФИРОМ. Црвенковски сега реши да ги спречи обидите на власта да си обезбеди алиби и да префрли на „опозициска сметка“ дел од одговорноста за евентуално неповолен извештај за напредокот на земјава во интеграцискиот процес.

„За се' друго што е поврзано со извештајот на ЕК - за политизираното судство, партизираната администрација, притисоците врз медиумите и НВО, за корупцијата, криминалот и катастрофалната економска ситуација, одговорноста е лоцирана само на една адреса - Влада на Македонија и на одговорното лице Никола Груевски“, рече Црвенковски.

Тој вчера одговори и на прозивките од ВМРО-ДПМНЕ да каже дали и зошто пред една и пол деценија, како премиер, ја одбил понудата за членство на Македонија во ЕУ: „Секој што тврди дека во 1994, 1995 година или, пак, во која било наредна година кога СДСМ бил на власт, ни била дадена понуда за членство во НАТО и за преговори со ЕУ под привремената референца, а ние сме одбиле, е ноторен лажго или тотален идиот. Оние што ќе се препознаат во некоја од овие категории може слободно да ме тужат за клевета или за навреда“, рече Црвенковски.

Според СДСМ, дебатата за тоа што се случувало во 1995 година е пропаганден проект на власта, а не само гаф на претседателот Иванов, кому му припаднала улогата да ја иницира расправата преку која ВМРО-ДПМНЕ се обидува да покаже дека македонските евроатлантски перспективи не се загрозени во последниве четири години, туку дека шансите биле прокоцкани пред 15 години.

Министерот Милошоски, од друга страна, смета дека е жално што Македонија не ги искористила доволно годините полни со евроентузијазам, но дека пропуштените моменти треба да бидат поттик за новата генерација македонски политичари како требало или не требало да се постапува.

Социјалдемократите вчера и' подадоа рака на власта во очекување на европскиот извештај, но и јасно укажаа дека не се откажуваат од намерата да издејствуваат предвремени избори по самитот на НАТО во ноември, независно од неговиот исход за Македонија и без оглед на тоа дали ДУИ ќе ја напушти владината коалиција. Милошоски, пак, се повикува на изборните рокови и процедури, посочувајќи дека кога ќе има избори одлучува македонското Собрание и оти следните избори се предвидени за 2012 година, доколку парламентарците не одлучат поинаку. (А.М.М.)