Поглед

За децата се работи

Светлана Унковска

Имаше право министерот за образование, Никола Тодоров, кога пред неколку дена најави дека за стартот на новата учебна година се' е подготвено. И навистина беше така.

Стартуваше првиот училиштен час, а учениците, родителите и професорите навистина беа подготвени и овој пат да се соочат со се' поголемит�� глупости што им се сервираат секоја година. Инаку, како ќе почневме ако се' беше нормално!?

А и министерот рече дека вакви проблеми имало во сите земји, па еве и кај нас ги има. Ако до лани најголемиот проблем беше тоа што цела година учениците ја поминаа без да имаат книги од кои ќе учат, тоа сега по овие катастрофални содржини во нив и не изгледа толку страшно. Хаотичноста, сепак, допрва доаѓа, а децата, кои вчера во училиштата се појавија насмеани, допрва ќе има на што да се смеат. Прво, наставниците ќе им речат на учениците да ги учат лекциите, а потоа суперревизорите ќе им речат да ги заборават и да учат нешто поинаку. Ментална гимнастика. Преку таква гимнастика, образованието навистина ќе биде сила.

Родителите и не ќе имаат лице да им кажат на своите деца да учат, а што ќе прават и професорите ако претходно ставиле оценка за лекција која потоа се покажала погрешна? Дали Тодоров пак ќе каже дека тој повторно не е виновен што ги правиме идните генерации од старт образовни инвалиди? А ако чувствува одговорност, зошто и не си ја понесе затоа што за ваков скандал во другите земји, кои претходно ги посочи министерот, првиот одговорен си поднесува оставка. Е, тоа е нормално, а не ваков старт на учебната година. И се' додека министрите ни се одговорни без одговорност, се' дотогаш во сите сфери во општеството постојано ќе ни се случуваат глупости. Но, последиците во образованието се многу поголеми и подалекосежни. Затоа што се работи за нашите деца.