Прељубиште пример за модерно европско образование

Информатичката наука за почеток ќе ја совладуваат 35 ученици

Гојко Ефтоски

ТЕТОВО - Во селото Прељубиште, Општина Јегуновце, вчера почна со работа прво средно мултиетничко училиште. На училишното ѕвонче се одзваа 35 ученици кои ќе ја совладуваат информатичката наука. Во првата година, распоредени во две паралелки, учениците ќе след��т настава на македонски и на албански јазик.

Училиштето во Прељубиште, единствено не само во Македонија, туку и на Балканот, ќе работи во состав на Средното стручно училиште „Моша Пијаде“ од Тетово. Оваа образовна институција е основана со одлука на владата на Норвешка и на Министерството за образование, како втора фаза на проектот за унапредување на интеретничката комуникација и меѓунационалната толеранција. Проектот се реализира преку НВО „Нанси дијалог-центар“ од Скопје.

„Отворањето на училиштето во Прељубиште претставува историски ден не само за Јегуновце, туку и за целиот регион“, изјави Стејнер Брин, директор на „Нанси мрежата“ за Европа. Тој нагласи дека во вакво училиште се гради иднината на Европа и додаде дека прашањето за интеграција на земјите и народите е најголем предизвик.

Отворањето на интегрираното училиште претставува значаен настан, тоа го потврди и фактот што во Прељубиште дојдоа и амбасадорите на ОБСЕ во Македонија, Хозе Луис Хереро, на Норвешка, Кјетил Паулсен, како и членовите на Владата, вицепремиерот Абдулаќим Адеми и министерот за образование, Ник��ла Тодоров.

За изградбата на училиштето, владата на Норвешка додели 110.000 евра. Објектот располага со 350 квадратни метри корисна површина. „Оваа година со помош на Министерството за надворешни работи на Норвешка изградивме училиште, мало по големина, но големо по значење. На ова место се развива новиот современ модел на европско образование - интегрирано и двојазично. Интегрираното основно училиште, кое овде работи веќе две учебни години, и ова сега - средното се двете училишта кои ќе бидат дел од историјата на новиот образовен систем во Македонија“, нагласи Сашо Стојковски, координатор на проектот и извршен директор на НДЦ Скопје.

Министерот за образование и наука, Никола Тодоров, рече дека настава во Прељубиште ќе следат 35 ученици. „Како што ќе се развива проектот, така и ќе се доградува, за да прифати наредни генерации“, нагласи Тодоров.

Учениците се распоредени во две училници, 20 со настава на македонски и 15 на албански. Три пати во неделата учениците заеднички ќе слушаат предмети на двата јазика. Марјан Стаматовски од селото Туденце е еден од првенците во училиштето. „Најважно е што ќе учам тоа што сум посакувал - електроинформатика. Ќе дадам се' од себе во реализација на целите“, вели овој ученик. Неговиот врсник Бесарт Јусуфи од селото Палатица рече дека недоволно го познава македонскиот јазик и дека сега ќе има можност да го совлада. „Ќе биде добро и интересно за сите. Се надевам дека ќе успееме“, вели Јусуфи.

Новите средношколци заминаа во своите училници. Со нив на свеченоста беа веќе „старите“, интегрирани преку наставата од основното образование кои и трета година ќе ги надминуваат јазичните бариери, разликите. И понатаму ќе се работи на зближување на учениците и родителите, на отворена комуникација, дијалог, толеранција и надминување на стереотипите и предрасудите.