Хамас прогласи крај на примирјето со Израел
ГАЗА - Хамас прогласи крај на шестмесечното примирје со Израел, постигнато со посредство на Египет, во појасот Газа, што создава изгледи за ескалација во граничните борби. „Примирјето е готово“, рече официјален претставник на Хамас, Ајман Таха, во соопштението по завршувањето на разговорите со палестинските фракции во крајбрежната енклава под контрола на исламистичката група. Тој рече дека примирјето, кое според Хамас требаше да истече на 19 декември, нема да биде обновено „бидејќи непријателот не се држи до своите обврски“ за олеснување на блокадата на појасот Газа и запирање на сите напади.
Хамас не се закани со непосредна ескалација против Израел, кој се надеваше дека ќе се продолжи примирјето и се чини дека е претпазлив околу конфронтација која би можела да предизвика големи жртви на двете страни. „Сметаме дека примирјето е во најдобар интерес на двете страни“, рече портпаролот на израелското Министерство за надворешни работи, Јигал Палмор. „Би сакале да продолжи. Ако Хамас избере насилство наместо примирје, ракетирање наместо можност за подобрување на ситуацијата во Газа, тогаш мора да се запрашаме дали Хамас мисли на најдобрите интереси на своите луѓе или има инволвирано надворешни интереси“.
Палмор не ги наведе надворешните влијанија, но Хамас добива поддршка од Иран, а лидерите на Хамас живеат во егзил во Сирија. Марк Регеф, портпарол на премиерот Ехуд Олмерт, изјави дека над 30 ракети истрелани од Газа во Израел во текот на викендот се „спротивни на примирјето“.
Израел е подготвен да ги почитува условите од примирјето, но „секоја истрелана ракета е директно и флагрантно кршење на постигнатото разбирање, и не може да се толерира“, рече тој. ЕУ повика во едно соопштение на „итен прекин“ и на ракетниот оган и на израелските упади. (Ројтерс) |
