Лукашенко побара пет милијарди од САД
МОСКВА - Претседателот на Белорусија, Александар Лукашенко, им се обрати на САД да му дадат кредит од пет милијарди долари. Засега Американците не му помогнаа. Таа информација Лукашенко ја соопшти пред државните медиуми кои ја објавија вчера. Белорусија годинава веќе доби од Русија две милијарди долари. „Нам сега ни е тешко, па им се обративме и на Американците за помош. Навистина, тие не брзаат да ни помогнат. Мислам дека за нив пет милијарди не се проблем. Всушност ние не бараме бесплатна помош, тие пари ние би ги вратиле...Односите со Вашингтон забалежително може да се подобрат“, изјави Лукашенко.
Претседателот на Белорусија изјави дека Америка и Западна Европа ја поддржале Белорусија за Меѓународниот монетарен фонд да и' даде кредит од две милијарди долари. „Дај боже новата американска администрација да сфати дека ние сме за нормализација на односите со САД не само затоа што тие се поголеми и посилни. Тие многу можат да помогнат во почитувањето на нашите интереси“, изјави Лукашенко.
Во истото интервју Лукашенко изјави дека поставувањето на елементите на ПРО во Полска и Чешка ја загрозува Белорусија. Во споменатото интервју Лукашенко во повеќе наврати истакнуваше дека желбата на Белорусија да ги нормализира односите со Запад не значи нејзино одвојување од Русија. (Б.В.) |
