Ловат вештерки наместо покана за НАТО

Досиеја, партиски метли, пропаднати надежи - Македонија две седмици пред самитот на НАТО

Соња Крамарска

Бомбастичните политички пораки за силните зало��би на македонското државно раководство за членство во НАТО оваа година не се дел од амбиентот во Скопје. Нема ниту трага од трескавичните лицитации пред самитот на НАТО во Букурешт во 2008 година и грчот во кој живееше целата нација очекувајќи ја одлуката на Алијансата.

Оваа година, во предвечерјето на самитот на НАТО во Лисабон, македонската политичка елита реши продолжено да го празнува Halloween - Ноќта на вештерките, чие официјално одбележување светот го направи кон крајот на октомври. На политичката сцена во Скопје е отворена сезоната на лов на вештерки. Лиферување досиеја, играње на партиски метли, извештаи за пропаднати надежи - се само дел од затегнатата политичка клима.

Поранешниот премиер Владо Бучковски вели дека во претходните години самитите на НАТО биле главна политичка тема во Македонија, што не е необично ако се знае дека над 90 проценти од граѓаните на нашата земја се за зачленување во Алијансата. „Сега како да се срамиме да спомнеме дека чекаме покана за членство“, вели тој.

Односите на двете главни политички партии, ВМРО-ДПМНЕ и СДСМ, се паднати на најниско можно ниво. Владејачката партија со помош на претседателот на државата Ѓорге Иванов, кој се впушти во политичките игри, обелодени документи за потрошени 340 илјади евра за комуникациска стратегија од страна на претходниот претседател Бранко Црвенковски. Социјалдемократите возвратија со обвинување дека ВМРО-ДПМНЕ ги уништи документите за потрошените пари за проектот „Скопје 2014“, со цел да не им паднат в раце на политичките противници кога тие ќе дојдат на власт.

Не е подобра ситуацијата ниту во албанскиот политички камп. Лидерот на ДПА, Мендух Тачи, за кого ДУИ се сомнева дека стои зад лиферувањето кодошки досиеја против нивните партиски првенци, го обвинува Али Ахмети дека сака да ги врати Албанците во претцивилизациско време. Ахмети возвратил дека Тачи не знае со кого има работа.

Што повеќе да се каже за еден ваков политички тон, со кој моментно се води дебатата во Македонија и тоа, главно, за промашени прашања. Претстојниот самит на НАТО и сигурното фијаско на Македонија, второ или трето, никој не ги спомнува.

Од 12 до 16 ноември во Варшава се одржува и редовното годишно парламентарно собрание на НАТО, кое годинава ќе биде во функција на самитот на НАТО, што ќе се одржи три дена по собирот во Варшава. „Овие заседанија се саем на парламентарната демократија, но Македонија овој пат, прв пат во својата историја, испраќа само еден претставник, бидејќи нашиот парламент решил да штеди“, критикува Бучковски.

Пратеникот од ДУИ, Талат Џафери, кој ќе биде македонски претставник на собирот во Варшава, кусо вели дека тоа се формални собири што се одржуваат секоја година и оти не му се потребни никакви подготовки и брифинзи пред да замине.

Но, дали е така? „Тоа испраќа лоши сигнали дека Македонија крена раце од дипломатската битка за членството во НАТО“, коментира Бучковски.

Политичкото раководство на Македонија повеќе се фокусира на правењето анализи какви последици ќе имаат државата и граѓаните од промена на името, додека вистинска и релевантна анализа за можностите за напредок на државата без членство во НАТО и во ЕУ никој не нуди.

Поранешниот премиер Љупчо Георгиевски во интервју за телевизијата Алсат-М адресираше жестока критика до Владата за нејзиниот отпор за договор со Грција. „Несфатливо е нивното спротивставување новото име на Македонија да биде запишано во Уставот кога тие го кршат секогаш кога на меѓународните собири носат беџови на кои пишува дека се претставници на БЈРМ, а не на Република Македонија што, според нашиот Устав, е официјално име на земјава“, вели тој.