Концерт

Северина го стресе Скопје!

Контроверзна, провокативна, секси... Хрватската ѕвезда во саботата вечер приреди тричасовен спектакл во полната сала „Борис Трајковски“

Катерина Шекеровска

Северина им одржа лекции по концерт на своите балкански колеги! Буквално ја урна спортската сала „Борис Трајковски“, која во саботата вечер беше претесна да ги прими сите нејзини обожаватели, но и љубопитници што дојдоа во живо да го проследат настапот на една од најконтроверзните балкански пејачки.

Во свој стил, оригинална и провокативна, направи спектакл што долго ќе се памети и прераскажува. Кога е Севе во прашање - нема промашување. Забавата е загарантирана, а здодевноста непозната. Северина едноставно прави се' - и пее, и глуми, и танцува, и зборува... И што уште не. Шоумен пар екселанс.

Ретроспективно, концертот почна нешто подоцна од најавениот почеток во 21 часот. Не помогнаа ниту апелите на организаторите за доаѓање на време - македонскиот народ едноставно си ја има навиката да доаѓа во 5 до 12. Нејсе. Тоа воопшто и' не беше битно во вечер во која можеа да се видат само задоволни и насмеани лица. Концертот почна со насловната тема од последниот албум „Здраво Маријо“, која на сцената ја донесе Северина облечена како невеста, во венчаница, за малку потоа да ја видиме во ултра мини-светкав фустан и рефрен од „Додирни ми колена“. „Лола“ веќе убаво ја распеа расположената публика што почна спонтано да станува од столчињата (сите места беа за седење) и да игра на познатиот ритам...

„Добровечер Скопје, добровечер добри луѓе! Знаете дека доаѓам од најубавиот град на светот, Сплит, но во душа, всушност, сум една обична ’дјевојка са села‘“... Публиката повторно покажува дека и' ги знае песните наизуст, па така се редат „Криви спој“, „Мили мој“, со која го отвора кабаре делот... И одново преслекување, Северина никогаш попровокативна, облечена како кабаре пејачка...

Северина се гледа, слуша, озборува... Никој не останува рамнодушен на нејзината појава. Има добро осмислено сценарио, видеобим-занимации додека се преслекува, секси (а богами и пополнички) танчарки, одлични музичари... Кокетира со публиката, ја заведува на најсуптилен можен начин... Следува дел посветен на баладите, ја гледаме во „скромен“ виолетов фустан во кој повторно до израз доаѓа нејзиното деколте... Се пеат „Поглед испод обрва“, „Шта ме сад питаш шта ми је“, „Мушкарци треба само курва“... Токму на оваа песна во заднина одат снимки од спотот на кој Северина се појавува во непрепознатливо издание, со модринки, крв на носот, малтретирана, расплакана... Следуваат повесели ноти, ново пресоблекување – овој пат слично на стомачните танцарки, во шалвари и светкаво прслуче... Игра, меша, скока, се качува дури и на лулашка лебдејќи високо во воздухот пеејќи „Тридесетте“...

Доаѓаат петте минути и за специјалниот гостин - легендарниот Горан Бреговиќ (потписник на нејзиниот последен албум „Здраво Маријо“), кој со својата колешка си разменува бкнежи на сцената. Дочекан со овации признава дека одамна не бил во Скопје, а публиката ја чести со заедничка изведба на „Гаде“ и во негова чест - „Ружица си била“... Пее цела публика, следува мала пауза за нов аутфит и на сцена се појавува Севе со маичка со натпис „Лове Скопје“, испишано на кирилица. Северина мисли на секој детаљ, точно знае што да каже и во кој момент, раскажува анегдоти, ја „закачка“ Даниела Мартиновиќ, пее песна од Оливер Драгојевиќ... Ги слушаме „Адам и Сева“, „Мала је дала“, „Анте“ ја изведува во стилот на Мајкл Џексон, со шапка, палто и ракавица што завршува во публиката... Сите се на нозе на „Гас, гас“, „Ја само пјевам“ и последната, „Вирујем у те“...

„Ви благодарам многу. Ми го наполнивте срцето и душата. Моето срце има десет илјади отчукувања. Вечерва ми го спасивте животот“, беше последниот поздрав од Северина упатен до македонската публика, дваесетина минути по полноќ. Цели три часа траеше спектаклот во кој атмосферата постојано беше на ниво, што е одлика само на големите уметници.

И покрај сите контроверзии, Северина уште еднаш докажа дека и тоа како добро си ја знае работата. Уште отсега се бара карта повеќе за нејзиниот нареден концерт во земјава.