Италија ќе и' врати затвореници на Албанија
Тирана/Рим Италија најави враќање на 3.300 затвореници кои се државјани на соседните земји, од кои најголемиот број се Албанци, поради преоптовареност на италијанските затвори.
Италијанскиот министер за правда Ангелино Алфано изјави дека според планот за намалување на преоптовареноста на затворите во Италија, во соседните земји ќе се испорачаат 3.300 затвореници, кои извршиле полесни кривични дела, пренесуваат албанските медиуми.
Според медиумите, во италијанските затвори се наоѓаат над пет илјади албански државјани, од кои се планира две илјади затвореници да ја продолжат казната во албанските затвори. Директорот на албанските затвори Газменд Дибра вчера реагираше на таквата најава, нагласувајќи дека Албанија не е во можност да прифати враќање на затвореници. (Макфакс) |
