По 87 години прва седница на владата надвор од Лондон
Лондон - Британската влада својата прва седница по годишните одмори ја одржа вчера во Бирмингем, а не во Даунинг стрит 10 во Лондон или во летната резиденција на британските премиери во Чекерс, што е прв ваков случај по 1921 година.
Пред 87 години, владата на тогашниот премиер Џорџ Лојд одржала седница во шкотскиот град Инвернес во зградата на локалниот градски совет во време кога таму на одмор се наоѓал претседателот на владата. Со своите министри премиерот Лојд тогаш расправал за мошне актуелното прашање од тоа време, ирското напуштање на британската монархија. Нема посебно објаснување зошто актуелниот премиер Гордон Браун ја преселува владата во Бирмингем, но во просториите во Даунинг стрит 10, каде што живее премиерот и каде што заседава владата, се' уште траат работите околу разубавувањето на зградата, па се претпоставува дека затоа владината седница се одржува во градот кој е втор по големина во Британија.
Според соопштението на кабинетот на Браун, на седницата ќе биде промовиран документот според кој „Британија може да го преброди сегашниот економски застој“. Минатата недела министерот за финансии Алистер Дарлинг изјави дека Британија се соочува со најтешката економска криза во последните 60 години. (МИА)
