Евакуирани 800.000 луѓе пред налетот на ураганот „Ајк“
Во историјата на Куба не се памети државата да ја погодат два урагана толку брзо едноподруго како сега „Густав“, па „Ајк“
ХАВАНА - Ураганот „Ајк“ ја погоди северна Куба во текот на ноќта со огромни бранови и поројни дождови, но незначително ослабе додека се движеше преку островот. Максималните ветришта на невреме од втора категорија се со брзина над 165 км/час. Некои куќи по должината на крајбрежјето, каде што се евакуирани околу 800.000 луѓе, се уништени неповратно.
Претходно, „Ајк“ однесе 61 живот на Хаити и, наводно, уништи 80 отсто од куќите на главните острови Туркс и Кекос.
Кубанскиот метеоролошки институт соопшти дека центарот на ураганот пристигнал на брегот во близина на Пунта Лукреција во државата Холгвин, околу 823 км југоисточно од главниот град Хавана. Имајќи предвид дека ураганот „Густав“ ја погоди Куба пред само една недела, службите за вонредни состојби на Куба, кои се меѓународно признати, се растегнати до крајни граници, јави дописникот на Би-Би-Си од Хавана.
„Густав“ предизвика сериозно оштетување на западната страна на островот, при што уништи речиси 100.000 куќи. „Во целата историја на Куба никогаш не сме имале два урагана толку блиску“, рече Хозе Рубиера, шеф на метеоролошката служба на Куба, за државната телевизија.
Се предвидува дека „Ајк“ ќе стигне до Хавана утре изутрина. Директен удар врз густо населениот град со два милиона жители и несигурни колонијални згради би можел да биде опустосувачки, јавуваат дописниците.
Во градот Холгвин, хотелски работник јави за новинската агенција Ројтерс: „Постои голема загриженост, прозорците почнуваат да се кршат. Има многу вода, врне многу силно“. Меѓу евакуираните пред доаѓањето на „Ајк“, има 15.000 туристи. (Би-Би-Си)
|
