Нова мониторинг-мисија за Mакедонија?
Политичкиот дијалог е една од најкрупните забелешки на претставниците на ПССЕ
Членовите на постизборната мисија на Парламентарното собрание на Советот на Европа, Андреас Грос и Мевлут Чавушоглу, на крајот од дводневната посета на Македонија најавија дека во септемврискиот извештај можно е да предложат повторно отворање мониторинг-мисија за Македонија. Тие завчера на прес-конференција истакнаа дека идентификувале одредени проблеми, односно одреден дефицит во однос на демократијата, владеењето на правото и човековите права кои се основните вредности врз кои се темели Советот на Европа.
„Ние се' уште сме во фаза на анализирање и ќе ја разгледаме оваа можност која можеби ќе биде предложена на Бирото на Парламентарното собрание“, рече Чавушоглу.
Политичкиот дијалог е една од најкрупните забелешки на претставниците на ПССЕ, кои наедно ја повикаа ДПА да се врати во Собранието. „Бојкотот на ДПА на парламентот не е зрело однесување. Им порачуваме да го сопрат, бидејќи нив ги избрале граѓаните и тие ним им должат да бидат во Собранието“, изјави Грос. (Д.Р.) |
