Насловна

Скопје го одврза кесето за Вардар

Со вчерашниот ребаланс на буџетот, градот издвои 15 милиони денари за фудбалскиот клуб, но оттаму порачаа и дека нема вечно да го финансираат

Сашко Ѓ. Димовски

Буџетот на Град Скопје беше ребалансиран вчера, па фудбалскиот клуб Вардар од денеска може непречено да ја користи финансиската помош од градските власти во висина од 15 милиони денари (околу 240.000 евра). Предлог-програмата за изменување и дополнување на Програмата за активности на град Скопје во областа на спортот за 2011 година, со акцент за реанимација на Вардаровиот фудбалски погон, беше ставена на дневен ред на вчерашната маратонска седница на Советот и потоа усвоена, со што црвено-црните можат да здивнат по подолго време. Сигурни пари ќе има за нормално функционирање на клубот за целата наредна сезона.

„Познат е фактот дека од поодамна Вардар се соочува со тешка криза и со проблеми од финансиска, од кадровска и од организациска природа. Од друга страна, општо познат е фактот дека овој клуб со своите некогашни успеси се втемели во историјата и на град Скопје. Може да се каже дека успесите на Вардар оставија неизбришлива трага во поновата историја на градот и придонесоа за голема афирмација на неговото име низ светот. Затоа, во овие тешки моменти, градот има обврска да помогне во неговото закрепнување“, стои во дел од образложението на Предлог-програмата на Комисијата за спорт при Советот на Град Скопје, чија што правна основа за нејзино донесување се членот 36 од Законот за локална самоуправа и членот 22 од Законот за спорт.

Но, дознаваме дека финансиската поддршка за Вардар во ваков обем нема да биде вечна, бидејќи тоа се средства што Град Скопје не може да ги издржи на долг рок. Помош се најавува и за наредните две-три сезони, односно се' додека клубот не се трансформира во акционерско друштво, не застане на здрави нозе и не почне да функционира стабилно, професионално и без пречки. Идентична финансиска помош за вардарци се најавува до 2014 година, иако не се исклучува можноста таа да биде повисока од 15 милиони денари годишно. Потоа ќе следува постепено повлекување на Градот од клубот во финансискиот дел, но не и во управувачкиот, кога ќе се заклучи дека колективот е подготвен да се издржува сам.

„Во моментот наша цел е ревитализација на клубот. Идејата е на Вардар да му се врати стариот сјај и повторно да прерасне во клуб со кој ќе се гордееме сите, како што се гордееја минатите генерации“, ни изјави претставникот на градската Комисија, Александар Бичиклиски.

Досегашниот буџет на Град Скопје за поддршка и унапредување на спортот и на спортските клубови изнесуваше 12 милиони денари. Со најновата интервенција, сега ќе достигне до 27.540.000 денари. Вардар, пак, преку ноќ закрепнува и од клуб-должник и загубар станува клуб без долгови. Финансиската инјекција од градот ќе се користи за исплата на заостанатите плати и за ликвидирање на клупските долгови од минатото кон сите институции. Неофицијално дознаваме и дека сите претходни претседатели во клубот и негови помагатели потпишале изјави дека немаат побарувања.

Од добро познати причини, Вардар оваа година ја имаше најтешката натпреварувачка сезона од своето постоење. Првпат не успеа да обезбеди опстанок во Првата македонска фудбалска лига, завршувајќи на претпоследното место на табелата, кое директно води во Втора лига. Послаби од вардарци беа само фудбалерите на Пелистер. Но, црвено-црните административно остануваат прволигаши по фузијата со фудбалскиот клуб Миравци, што се случи во втората половина од јуни. Моментно се наоѓаат на подготовки на Златибор, играчки се екипираат, ја темпираат формата, а довербата да го води тимот во сезоната што е пред нас ја доби Илчо Ѓоргиоски.

За салата на Лирија 2,5 млн. денари

Вардар не е единствениот спортски колектив на територијата на Скопје што ќе добие помош од градските власти. Финансиска поддршка е насочена и кон боречкиот клуб Лирија за реконструкција на салата во Чаир. За таа цел ќе бидат издвоени 2,5 милиони денари од градскиот буџет.