Кевендиш ги замолчи критичарите
Британецот највешт во хаотичната петта етапа на Тур де Франс, по која Брајкович се повлече од трката
Британецот Марк Кевендиш влезе меѓу десетте велосипедисти со најмногу етапни победи на Тур де Франс со тоа што стигна прв на целта во петта делница од трката до Кап Фреел, преполна со инциденти. Во финишот на етапата долга 164,5 километри тој им избега на белгискиот првак Филип Жилбер и на Шпанецот Хосе Хоакин Рохас. Со својата 16. етапна победа на Тур, возачот на Менксмен се израмни на вечната листа со петкратниот освојувач Жак Анкетил. Норвежанецот Тор Хусховд ја зачува жолтата маичка наменета за најдобриот во вкупниот поредок.
Пред Кевендиш да стигне до својата прва етапна побед�� во годинашното издание на најпрестижната велосипедска трка, речиси сите познати имиња во колоната го „бакнаа“ асфалтот во возењето по силен ветер покрај брегот на Бретања, почнувајќи од трикратниот победник Алберто Контадор. Шпанецот, кој помисли дека ја освои четвртата етапа пред да сфати дека за влакно пред него финиширал Австралиецот Кадел Еванс, падна на 88 км до целта и го фрли велосипедот во лутина пред да се врати и да ја стигне колоната.
Најмалерозен тим беше Радиошек, кој го изгуби својот лидер Јанез Брајкович. Словенецот падна четири километри пред Контадор и беше принуден да се повлече од трката.
„Тежок ден. Но, не може ништо да се стори. Тоа е Тур де Франс, тоа е лотарија. Речиси сите паднаа. Се надевавме дека ќе имаме четворица лидери на Пиринеите, но ќе ги има само тројца“, изјави тимскиот директор на Радиошек, Алан Галопен.
На Брајкович му беше дијагностициран потрес на мозокот, но скенирањето на мозокот во болницата во Жињамп не откри ништо сериозно. Словенецот доби и третман за повредата на рамото.
Меѓу другите тимски лидери зафатени со карамболот беа и Холанѓанецот Роберт Гесинк, кој ги изгреба коленото и лакотот, како и Британецот Бредли Вигинс, кој изгуби минута по масовниот судир, но беше вратен во групата од своите колеги од тимот на Скај. Квик степ беше речиси идентично погоден како Радиошек со тројца возачи што паднаа, а најдебелиот крај го извлече поранешниот светски првак Том Бонен од Белгија, кој стигна на целта долго по главната група со повредено рамо.
Резултати од петтата етапа: Марк Кевендиш (В. Британија, ХТЦ) 3:38,32 ч., Филип Жилбер (Белгија/Омега) исто време, Хосе Хоакин Рохас (Шпанија/Мувистар) исто време итн.
Вкупен поредок: Тор Хусховд (Норвешка/Гармин) 17:36,57 ч., Кадел Еванс (Австралија/БМЦ) +1 секунда, Френк Шлек (Луксембург/Леопард) + 4 секунди итн. |
