Охридски маратон во полн сјај за јубилејот

Миодраг Мицковиќ

Се вршат последните подготовки за јубилејниот 25. Охридски пливачки маратон што ќе се одржи на 14 август. Откако е обновен маратонот, прв пат е сменет терминот на неговото одржување - досега секогаш беше сабота, а овој пат трката ќе се одржи в недела. Стартот е закажан за 11 часот во Свети Наум, од каде што маратонците ќе треба да испливаат 30 километри до охридското пристаниште.

Веќе се пристигнати и првите пријави на учесниците. На патеката „Климе Савин“ ќе се појават маратонци од десет држави, од кои 14 во машка и осум во женска конкуренција. Аргентина, Бугарија, Италија, Бразил, Словенија, Холандија, Канада, Шпанија, Сирија и Македонија ќе имаат претставници на престижната трка од Гран-при серијата на ФИНА.

Своето учество во машка конкуренција го пријавија Петар Стојчев и Цветан Јорданов од Бугарија, Гилјермо Бертола од Аргентина, Јан ван дер Хулст од Холандија, Мохамед Салех од Сирија, Рок Керин од Словенија, Мауро Напа, Родолфо Валенти и Андреа Волпини од Италија, како и нашите маратонци Томи Стефановски, Евгениј Поп Ацев, Александар Илиевски, Александар Панчевски и Дејан Младеновски.

Во женска конкуренција ќе настапат Аргентинките Хеихо Пилар и Рита Ванеса Гарсија, потоа Естер Нуњез од Шпанија, Маријана Мело од Бразил, Вероника Кристи и Аурелија Коте од Канада и Италијанките Николета Симонази и Александра Ромити.

Наградниот фонд на јубилејниот Охридски маратон е 25.000 долари. Победникот во машка конкуренција ќе добие 3.000, второпласираниот 2.100, а третопласираниот 1.500 долари. Исти суми ќе ја добијат и првите три маратонки на целта. Освен тоа, предвидени се и три награди за генерален пласман: првиот ќе добие 900 долари, вториот 700 и третиот 600.

Охридскиот маратон и годинава се одржува под покровителство на претседателот на Република Македонија, Ѓорѓе Иванов. Организатор е Пливачката федерација на Македонија, која има потпишан ексклузивен договор со ФИНА за организацијата и единствено таа може организацијата да ја довери на друг субјект. Засега, немаме информации дека е тоа сторено. Технички организатор на маратонот треба да биде, како и секоја година, пливачкиот клуб Охридски бранови, кој во последниве четири години доби специјални признанија од ФИНА, но се' уште не се знае дали и годинава ќе ја врши таа одговорна улога.

Главен фаворит за првото место е, кој друг, туку Бугаринот Петар Сојчев кој досега за овие 25 години, има девет пати победено, што е рекорд на трката. Меѓу кандидатите за висок пласман е и нашиот Томи Стефановски, кој на маратонот во Сен Жан во Канада го освои третото место. За жал, Македонија повторно ќе нема претставник во женска конкуренција.