Бомбаш-самоубиец разнесе 16 лица

КОХАТ - Бомбаш-самоубиец вчера се крена во воздух покрај преполн автобус во северозападниот дел на Пакистан, при што загинаа најмалку 16 лица. Пакистанските власти поддржани од САД се соочуваат со талибански бунтовници што ја поддржуваат кампањата со самоубиствени бомбашки напади како пркосење на серијата воени офанзиви почнати минатата година против нивните упоришта во северозападниот дел од земјата. „Момче на возраст од 18 до 20 години, кој имал околу шест килограми експлозив, го изведе нападот“, изјави Дилавар Бангаш, полициски началник во градот Кохат каде што се случи вчерашниот бомбашки напад. Шеснаесет лица беа повредени, посочија болнички извори.

Очевидецот на настанот, Инајат Оракзаи, рече: „Автобусот, кој беше полн со патници, се подготвуваше да тргне кога тинејџерот се приближи до вратата на автобусот и се крена во воздух“. Пакистанското талибанско движење, кое е поврзано со Ал Каеда, ја презеде одговорноста за двата самоубиствени бомбашки напада врз комплексот канцеларии на владини официјални претставници во регионот Мохманд во северозападниот дел на земјата што се случија во понеделникот каде што загинаа најмалку 40 лица. Бомбашите го извеле нападот додека беше во тек состанокот за изнаоѓање начини за зајакнување на племенските милиции формирани за да и' помогнат на власта да се бори против милитантите.

Тајните американски дипломатски депеши објавени на „Викиликс“ поведоа прашања за заканите што доаѓаат од пакистанските милитантни групи, за власта во Исламабад и за нејзиниот сојузник Вашингтон. (Ројтерс)