Французинките се вратија во игра на СП во Кина

Ракометарките на Русија, Норвешка, Романија, Јужна Кореја и Шпанија се веќе во вториот круг

Победата над Шведска од 23:21 во третото коло ги залечи раните по поразите од Бразил и од Данска и ги врати француските ракометарки во игра за вториот круг на Светското првенство во Кина. Швеѓанките се чинеше дека ги имаат в раце двата бода откако на полувремето водеа со 13:9, а при крајот и со 20:17, но со пет гола во низа избраничките на селекторот Оливие Крумболц направија целосен пресврт и ја искомплицираа ситуацијата во групата А.

„Крајно среќен сум од тоа што го направија моите девојки денеска и од тоа како си го вратија духот“, изјави Крумболц. Неговиот колега Пер Јохансон, пак, беше разочаран: „Имавме толку многу шанси да го решиме натпреварот, но не го најдовме клучот за отворање на вистинската врата“.

Швеѓанката Босен со пет гола беше прв стрелец на мечот, а во францускиот состав се издвои Сињате со четири погодока.

Австрија, која во баражот беше подобра од Македонија, изненади со високата победа над Ангола од 28:21, имајќи ги предвид победите на африканскиот шампион над Австралија и посебно над Украина во групата Б. Најголемите заслуги одат на сметка на Катрин Енгел, која постигна половина од австриските голови, а Елзира Таварез даде десет за Ангола.

„Горд сум на мојот млад тим. Одигравме многу добра одбрана, но имавме и добар напад“, задоволен е австрискиот селектор Херберт Милер.

Во вториот круг на мундијалот веќе се бранителот на титулата Русија, потоа олимпискиот и европски првак Норвешка, како и Романија, Јужна Кореја и европскиот вицешампион Шпанија.

Резултати од третото коло, група А: Германија - Бразил 32:30, Данска - Конго 37:24, Франција - Шведска 23:21. Табела: Данска 6, Германија 4, Шведска 4, Бразил 2, Франција 2, Конго 0. Денеска играат: Франција - Конго (10 ч.), Бразил - Данска (12 ч.), Шведска - Германија (14 ч.).

Група Б: Украина - Тајланд 41:13, Ангола - Австрија 21:28, Русија - Австралија 48:8. Табела: Русија 6, Австрија 6, Ангола 4, Украина 2, Австралија 0, Тајланд 0. Денеска играат: Ангола - Тајланд (10 ч.), Австралија - Украина (12 ч.), Австрија - Русија (14 ч.).

Група Ц: Јапонија - Тунис 31:31, Норвешка - Чиле 44:15, Романија - Унгарија 31:25. Табела: Норвешка 6, Романија 6, Унгарија 4, Тунис 1, Јапонија 1, Чиле 0. Денеска играат: Чиле - Јапонија (10,15 ч.), Унгарија - Норвешка (12,15 ч.), Романија - Тунис (14,15 ч.).

Група Д: Брег Слонова Коска - Аргентина 19:19, Јужна Кореја - Кина 33:25, Шпанија - Казахстан 30:12. Табела: Шпанија 6, Ј. Кореја 6, Кина 4, БСК 1, Аргентина 1, Казахстан 0. Денеска играат: Казахстан - БСК (7,30 ч.), Кина - Шпанија (9,30 ч.), Ј. Кореја - Аргентина (11,30 ч.).