Русите пиеле до 5 часот наутро пред првиот меч со Словенија

Фудбалскиот сојуз на Русија поведе истрага по информациите во руските медиуми за недолично однесување на дел од фудбалските репрезентативци на „зборнаја“ вечерта пред првиот бараж меч со Словенија за пласман на Светското првенство во Јужна Африка.

Руски „Канал 1“ доведе во студио вработени во московскиот хотел „Мериот“ каде престојуваа руските репрезентативци кои сведочеа дека вечерта пред натпреварот руските фудбалери седеле во хотелскиот бар со алкохол и цигари до пет часот наутро.

Рускиот сојуз спроведува интерна истрага, а реагираа и некои членови на руската Дума кои бараат казниза несовесните играчи. Сите фудбалери, пак, ги негираа обвинувањата. Браќата Василија и Алексеј Березуцки, наводно, поднесоа и тужби против телевизиската станица.

Грос нов тренер на Штутгарт


Швајцарецот Кристијан Грос е именуван за нов тренер на бундеслигашот Штутгарт по отказот што го доби неговиот претходник Маркус Бабел. До смена на кормилото на „швабите“ дојде по серијата од осум меча без победа на екипата од „Готлиб Дајмлер“. Штутгарт моментно е на 16 позиција на табелата, последниот триумф го прослави на 26 септември против Ајнтрахт Франкфурт. Тимот денеска го очекува клучен меч во Лигата на шампионите против романска Униреа против која на германскиот состав му се потребни трите бода за пласман во осминафиналето.


Фламенго нов шампион на Бразил

Фудбалерите на Фламенго ја освоија шампионската титула во Бразил. Во последното коло, на Маракана пред 80,000 гледачи, славеа над Гремио со 2:1 ија сочуваа предноста во однос на Интернационал и бранителот на титулата, Сао Паоло.

Гре��ио поведе со голот на Роберсон во 22 минута, Фламегно ја анулира негативата осум минути подоцна преку Давид. Погодокот вреден шампионски трофеј го постигна Ангелим во 70 минута. Поранешниот бразилски репрезентативец и напаѓач на милански Интер, Адријано, не успеа да погоди, но првенството го заврши како најдобар стрелец со 19 гола.

За најпопуларниот бразилски клуб (има дури 35 милиони навивачи) ова е шеста титула во историјата, прва по 1992 година.

Покрај Фламенго, пласман во Куп Либертадорес обезбедија Интернационал, Сао Паоло и Крузеиро, а од лигата испаднаа Коритиба, Санто Андре, Наутико и Спорт Ресифе.


Тепачка меѓу тренер и фудбалер во Стоук Сити


Напаѓачот на премиерлигашот Стоук Сити, Џејмс Бити, не се појави на понеделничкиот тренинг на екипата, а медиумите на Островот известуваат дека фудбалерот и тренерот Тони Пулис се степале во соблекувална во саботата по поразот од Арсенал.

Во клубот потврдуваат дека истражуваат наводна физичка пресметка која следи по одлуката на Пулис за тренинг како казна по поразот во денот што требаше да биде слободен за играчите.

Бити и Пулис одвај ги раздвоија останатите фудбалери, а напаѓачот очигледно реши да ги бојкотира одлуките на тренерот.