Силверстоун домаќин на трка уште 17 години

Трката за Големата награда на Велика Британија е спасена со склучувањето нов договор меѓу раководството на патеката во Силверстоун и првиот човек на Формула 1, Берни Еклстоун. Договорот е за наредните 17 години и со него најстарата трка во Ф1-календарот си го задржува своето место во историјата на мотоспортот благодарение на исчекорот на Силверстоун по неуспехот на Донингтон Парк да си ги исполни обврските.

„Отсекогаш сме имале петгодишен договор и никогаш не бевме во состојба да ги обезбедиме потребните инвестиции за реконструкција. Но, 17. години ни даваат можност да инвестираме и да одиме напред. Отсекогаш верувавме дека Британското гран-при е важен меѓник во Формула 1, но со Берни никогаш не сте наполно сигурни. На крајот на краиштата, мора да имате Британско гран-при. Сега мораме да продадеме многу влезници, да привлечеме барем сличен број гледачи како годинава кога имавме 230.000 луѓе во текот на трите дена, како и да го промовираме настанот“, изјави извршниот директор на патеката во Силверстоун, Ричард Филипс.