Ајверсон се врати во Филаделфија со пораз

Ален Ајверсон се врати на паркетот во дресот во кој ја почна сјајната НБА-кариера. Го бакна логото на Филаделфија и длабоко и се поклони на публиката. Сепак, не можеше да ја спаси Филаделфија од десетиот пораз во серија и 14. во последните 16 средби. Чонси Билапс постигна 31 поен, имаше осум скока и исто толку асистенции во победата на Денвер од 93:83 на големо разочарување на публиката во која се истакнуваше група со дресот број 3, истиот тој со кој се прослави Ајверсон.

„Се чувствувам како да се вратив дома. Публиката не ми помогна, поради нив бев понервозен од обично“, изјави Ајверсон кој мечот го заврши со 11 поени, пет скока и шест асистенции. Колку голем интерес предизвика враќањето на Ајверсон говори и податокот што салата за прв пат оваа сезона беше распродадена.

Веќе трет пат оваа сезона се сретнаа тимовите на Јута и на Сан Антонио, „џезерите“ ја запишаа и третата победа. Таква серија немаа уште од 1997 година, а најзаслужен за тоа беа Карлос Бузер, Рони Бривер и Дерон Вилијамс. Во победата од 104:101 Бузер вгради 27 коша, Бривер додаде 17 плус 10 скока, а Вилијамс, погодувајќи осум од последните десет шута мечот го заокружи со 17 коша и 11 асистенции. Поради кавга со судијата Дерек Ричардсон, Кори Меггети беше исклучен, прв пат по 2003 година, а со тоа и помогна на домашната Оклахома да слави против Голден стејт со 104:88. За победниците Дурант, Грин и Харден комбинирано постигнаа 75 коша плус 31 скок.

Њујорк победувајќи го ослабениот Портланд стигна до третата едноподруго победа.

ОДЕН ОПЕРИРАН, АУТ ДО КРАЈОТ НА СЕЗОНАТА

Грег Оден, 21-годишниот кошаркар на Портланд и прв избор на НБА-драфтот во 2007 година го оперираше коленото. Клубот од западниот брег информираше дека операцијата минала во ред, но и потврдија дека до крајот на сезоната не ќе може да сметаат на него. На средбата против Хјустон во саботата 213 сантиметри високиот Оден доживеа фрактура на пателата на левото колено. Со тоа само се потврдија поранешните прогнози според кои Оден не е физички подготвен за НБА-кошарка од моментот кога влезе во неа. Дебитантската сезона ја пропушти поради повреда на левото колено и грбот, минатата година пропушти 20 меча, а сега повредата го одвои од паркетот до крајот на сезоната.

Резултати: Филаделфија - Денвер 83:93, Њујорк - Портланд 93:84, Оклахома - Голден стејт 104:88, Јута - Сан Антонио 104:101.