Фестивал за независен филм во Скопје

Фестивалот „4 синхронизирани градови“ досега се одржа во Сараево, Приштина и во Амстердам

„4 синхронизирани градови“ е насловот на Фестивалот за независен филм и визуелни уметности, кој во Скопје ќе се одржи од 15 до 18 декември во просториите на Културниот центар ЦК, а е во организација на Центарот за нови иницијативи во уметноста и културата „Локомотива“. Овој фестивал веќе се реализираше во три града, во Приштина, Амстердам и во Сараево, а Скопје е неговата последна дестинација. Всушност, како што кажува и самото име на фестивалот, неговиот концепт е да се реализира во 4 града, значи да има 4 фестивали, програмата да трае 4 дена, а во него се вклучени 4 партнерски организации и копрограматори од градовите во кои годинава се одржува.

Фестивалот во Скопје ќе понуди филмска програма со документарен, краток, анимиран, експериментален и игран филм, потоа изложба на современи уметнички креации под наслов „Креативни градови, уметнички гратчиња и фантастични села“, ќе бидат одржани и презентации на две авторки од Белград и Холандија, а ќе се одржи и отворена дискусија на тема „Функционирањето на независните културни сцени во Скопје, Приштина, Сараево и Амстердам“. Програмата ќе биде збогатена со музички настапи.

На фестивалот во Скопје ќе присуствуваат уметници, режисери, музичари и претставници на партнерските организации од сите четири градови, додека на веќе одржаните фестивалски изданија во споменатите градови, присуствуваа голем број на уметници од Македонија.

„4 синхронизирани градови“ е резултат на потребата за создавање на услови за континуирана размена на информации и знаења за новите уметнички и културни креации на Балканот и Западна Европа во доменот на независниот филм и визуелни уметности, а негов креатор е млада генерација на уметници и културни работници. (Т.И.)