Наковска - Бикова петта во воздушен пиштол
На Оливера Наковска-Бикова и' избега медалот и на 13. Параолимписки игри во Пекинг, како што и' се случи и на претходните ПОИ 2004 во Атина. Тогаш македонската стрелачка го освои шестото место во дисциплината воздушен пиштол од 10 м, а овој пат се искачи една позиција погоре. Но, тоа е слаба утеха за втората на светската ранг-листа, која медалот го испушти во последната серија од финалето, кога испука само 8,9 круга, иако претходниот истрел и' беше 10,5! Медалот побегна за само 0,5 поени: Наковска-Бикова собра вкупно 462,1 поени, а освојувачката на бронзениот медал Наталија Далекова од Русија имаше 462,6.
Ванчо Каранфилов, пак, потфрли во истата дисциплина, во која заврши дури на 27. место меѓу 34 натпреварувачи со скромни 549 круга. Пред четири години тој во основниот дел испука тогашен европски рекорд од 570 поени, за потоа во финалето да го освои сребрениот медал.
Наковска-Бикова и Каранфилов утре од 3 ч. по македонско време ќе настапат во квалификациите во спортски пиштол од 25 м. (Р.Д.) |
