Шкотите реагираат зашто не можеле да влезат на Јужна
ФФМ тврди дека постапила според правилата на ФИФА
Наум Котевски
По големата победа на македонската фудбалска репрезентација, шкотските медиуми остро ја нападнаа Фудбалската федерација на Македонија за тоа што не дозволила околу 1.000 шкотски фанови со купени влезници по улиците на Скопје да влезат на Јужна трибина.
„Скопје во саботата не беше место кое ви вели добредојде, барем не на многуте навивачи на Шкотска, кои со купени влезници за Јужната трибина останаа на улица тотално разочарани“, пишува „Скотланд он Сандеј“, пренесувајќи ја изјавата на одговорното лице за безбедност при Шкотската фудбалска федерација, Дерек Кирквуд. „Со оние навивачи кои си имаа влезници добиени преку нашата Федерација немаше проблем. Но, тие што купија влезници во Скопје за Јужната трибина не успеаја да влезат на стадионот. Ние направивме апсолутно се' што е во наша можност. И кажав на полицијата: ’Па, погледнете ги овие момци, тоа се пристојни навивачи, најдобри во светот, ве молам да ги пуштите внатре. Знам дека купиле влезници на улица, но ве уверувам дека нема да направат никаков проблем‘. Но, следеше дециден одговор од полицијата: ’Не може!“, вели Кирквуд.
ФФМ е зачудена од ваквите написи, тврдејќи дека работела според прописите на ФИФА и според барањата на ФФ на Шкотска и на полицијата.
„Навистина чудат ваквите изјави. Правилата на ФИФА се јасни: како домаќини треба да им обезбедиме на гостите седум отсто од влезниците, односно 800. Ние дозволивме 1.000 билети за Источната трибина“, вели портпаролот на ФФМ, Зоран Николовски, напоменувајќи дека токму ФФ на Шкотска и шкотската полиција барала строги мерки на безбедност, односно немешање на навивачите. „Добивме официјално известување од нивната Федерација во кое се вели дека ќе дојдат многу повеќе навивачи отколку што има влезници. Тие побараа навивачите да бидат одвоени, впрочем таква е праксата на сите стадиони. Затоа и ние ја известивме јавноста дека секој навивач може да купи најмногу две влезници за Јужната трибина, и тоа со лична карта. Ние ги имаме податоците на сите фанови кои купиле влезница и тие ќе и' ги дадеме на полицијата. Таа понатаму ќе треба да направи истрага кој им препродавал влезници на шкотските навивачи. Работите се кристално јасни. Шкотските навивачи не купиле од ФФМ влезници за Јужна, туку од препродавачи и со тие влезници не можеа да влезат. Да постапевме обратно и не дај боже да се случеше нешто лошо, тогаш поинаку ќе се коментираше“, вели Николовски, додавајќи дека за мечот со Холандија работите ќе бидат поинакви. „Холандската фудбалска федерација не' извести дека се очекуваат околу 500 Холанѓани, па оттаму е решението да можат да се купуваат влезници за Јужна без лична карта“. |
