ВМРО-ДПМНЕ ќе слави, СДСМ ќе бојкотира

Остри реплики си разменуваат власта и опозицијата околу претстојниот празник 23 Октомври, денот на македонската револуционерна борба

Жаклина Хаџи-Зафирова


Како и претходните празници така и 23 Октомври, Денот на македонската револуци��нерна борба, нема да помине без искричења и поделби меѓу власта и опозицијата. Социјалдемократите нема да учествуваат на манифестациите по повод празникот што беше воспоставен пред четири години. СДСМ уште од самиот почеток ја бојкотира прославата на 23 октомври, кој го идентификуваат како празник на владејачката партија и за кој велат дека ниту го славеле, ниту имаат намера да го слават. Оттаму и' порачуваат на ВМРО-ДПМНЕ да го смени името на партијата, ако сакаат да се покаже единство на прославите. Во спротивниот табор, пак, реплицираат дека однесувањето на СДСМ личи на детска работа и затоа им порачаа „да пораснат“. на социјалдемократите

„Ниту сме го славеле, ниту имаме намера да го славиме овој празник бидејќи мислиме дека тој е востановен со цел да врши партиско-политичка манипулација со граѓаните. Најдобро би било партијата ВМРО-ДПМНЕ да си го смени името само во ДПМНЕ и да
каже дека наследството на историското ВМРО им припаѓа на сите граѓани, а не само на една партија. Тогаш сите заедно ќе го славиме овој празник“, изјави Гордан Георгиев од СДСМ, порачувајќи дека ќе ја продолжат досегашната практика и нема да се појават на активностите кои ќе се организираат на државно ниво.

Годинава, организатор на манифестацијата за Денот на македонската револуционерна борба е Собранието, кое ќе ја организира свечената академија што в недела ќе се одржи во Македонската опера и балет. Претходно, во 12 часот, во кристалната сала во Собранието ќе се доделува државната награда „23 октомври“ за 2011 година за долгогодишни остварувања во областа на науката, културата, образованието, заштитата на државните интереси и промоција на државните приоритети, вредности и културно-историското наследство на Македонија. Оваа награда годинава за остварување во областа на науката и образованието му се доделува на професорот д-р Томе Неновски. Додека, за остварување во областа на културата и уметноста, им се доделува на писателот Паскал Гилевски и на ликовниот уметник, Коле Манев.

Најавеното отсуство на опозицијата на овие настани, координаторката на пратеничката група на ВМРО-ДПМНЕ, Силвана Бонева го искоментира со порака дека СДСМ треба да порасне и да не се однесува детски.

„Еднаш одат на положување цвеќе пред споменици, а велат нема да одиме на академијата. Мислам дека треба да помине повеќе време за СДСМ да порасне и да прави разграничувања за тоа што е државен, а што партиски интерес“, рече Бонева. Таа смета дека не може да се поистоветува партискиот празник со државниот празник на Македонската револуционерна борба, па затоа е неоправдано отсуството на СДСМ. „Тоа е Ден на македонската револуционерна борба кој е посветен на жртвите за денешната слободна, самостојна и независна Македонија, а не е празник на партијата ВМРО-ДПМНЕ и не треба на тој начин да се понижува празникот. Никаде не е кажано дека е ден на ВМРО-ДПМНЕ, па да не присуствува СДСМ“, вели Бонева. За изјавата на Георгиев дека ВМРО-ДПМНЕ треба да го смени името за да се слави заеднички, таа искоментира: „Недопустливи се коментари на луѓе кои не припаѓаат на некоја партија, а кажуваат кое име таа треба да го носи“.

На 8 Септември, СДСМ не присуствуваше на централната прослава на дводеценискиот јубилеј од независноста-8, што се одржаа на плоштадот. Недоразбирања меѓу двете партии имаше и на 11 Октомври, бидејќи опозицијата ја обвинува власта дека не им го дава потребното значење на НОВ и на Денот на востанието. (Ж.Х.З.)