Судирот Црвенковски - Бучковски стигна до фаза на жалење

Лидерот на СДСМ возврати на критиките од некогаш блискиот соработник

Владо Бучковски, поранешен премиер и лидер на СДСМ, а сега најгласен критичар на актуелното раководство на партијата, му порачува на Бранко Црвенковски да излезе на непосредни внатрепартиски избори, ако е убеден дека е неприкосновен меѓу социјалдемократите. Реакцијата следи откако Црвенковски изјави дека го жали Бучковски што дошол во ситуација постојано да повторува едни исти работи за матичната партија.

Пак пламна судирот меѓу некогаш блиските соработници, што почна да се разгорува по предвремените парламентарни избори. Тие двајцата се виделе последен пат на 7 септември, на средбата што ја организираше премиерот Никола Груевски по повод Денот на независноста. Неколку часа подоцна Црвенковски го нарече Бучковски „омилен опозиционер на Груевски“, а потоа, речиси месец и половина, ги игнорираше забелешките што тој му ги испраќаше преку медиумите, залагајќи се за реформи и критикувајќи ги политиките на матичната партија.

Сепак, лидерот на СДСМ, деновиве, не го поштеди Бучковски од критики, туку во интервју за Алсат, му порача, меѓу другото, дека немаат смисла неговите барања за непосредни избори во партијата, бидејќи во 2004 и тој бил избран за лидер на СДСМ од делегатите на конгресот. Црвенковски напомена дека не се чувствува загрозен од Бучковски, бидејќи во сите партиски форуми атмосферата била мирна и работна. Освен тоа, тој е убеден дека и да излезе на непосредни избори, повторно ќе биде избран за лидер на социјалдемократите.

На лидерот на СДСМ му пречи што вниманието на јавноста се насочува кон опозицијата, во ситуација кога во државата врие од проблеми што ги предизвикува власта. Не му е сеедно ниту што Бучковски незадоволството го изнесува јавно, и покрај тоа што, како што рече, партиските тела биле отворени за дебата на која било тема, па и за смена на кормилото.

Одговорот на Црвенковски стигна до Бучковски, кој деновиве е во Црна Гора, каде што, како поранешен премиер, учествува на конференција за Балканот. „Црвенковски продолжува со очајните настапи по изборите, со кои само потврдува дека не знае што да прави и дека му е најлесно да си измисли внатрешен непријател“, возвраќа Бучковски.

Според него, нормално е опозициска партија по избори да се занимава со себе и да се фокусира на внатрешни реформи. Тој тврди дека истите забелешки ги изнесувал и на седниците на партиските тела, додека беше член на Централниот одбор, ама дека и тогаш му велеле дека пред избори не е вистинско време да се зборува за тоа. „Ако Црвенковски е толку сигурен во себе, јас го охрабрувам да свика вонреден конгрес и да распише непосредни избори за да си го тестира легитимитетот кај целото членство. Јас, пак, сум убеден дека никој од неговото опкружување нема да помине на непосредни избори“, вели Бучковски.

Идејата на Бучковски за непосредни избори датира од есента 2006 година, откако СДСМ ги изгуби изборите и почнаа барањата за негова смена од лидерската позиција. Истиот предлог сега е ставен во оптек повторно , како една од формулите за демократизација на партијата. Во меѓувреме, се сменија уште двајца лидери во СДСМ, Радмила Шекеринска и Зоран Заев. Црвенковски се врати на партиското кормило во мај 2009, кога му заврши мандатот како шеф на државата. На конгресот во јули годинава во Битола делегатите безмалку со консензус му изгласаа доверба, повикувајќи се на поправениот изборен резултат, во споредба со изборите во 2008 година. (A.M.M.)