Бријаторе: Алонсо е подобар од Шумахер

Некогашниот тимски шеф на Шпанецот во Рено смета дека тој е еден од најдобрите во Ф1-историјата

Флавио Бријаторе го смета Фернандо Алонсо за еден од најголемите возачи во историјата на Формула 1, додавајќи дека тој е подобар и од Михаел Шумахер. Додека ја извршуваше функцијата шеф на тимот на Рено, Бријаторе беше сведок на освојувањето на двете шампионски титули на Алонсо, по што Италијанецот работеше како менаџер на возачот. Со оглед на своето познавање на Шпанецот, Бријаторе е на мнение дека Алонсо е еден од „малкутемина големи возачи“ во овој спорт.

„Алонсо е посебна личност не само поради тоа што е голем возач, туку и поради тоа што тој е нормално момче - многу скромен, многу искрен“, изјави Бријаторе за „Онда серо“. „Тој е еден од неколкуте големи возачи, заедно со Сена, Прост и Шумахер. Во последните дваесет години видовме неколку феноменални возачи и Фернандо е еден од нив“.

Нагласувајќи дека Алонсо и Шумахер се „двајца целосно различни возачи“, Бријаторе смета дека Алонсо е за нијанса над седумкратниот светски првак.

„Фернандо е малку подобар, бидејќи кога Михаел станува депресивен, тој паѓа надолу, додека во иста таква ситуација концентрацијата на Фернандо се изострува“, објаснува 61-годишникот.

Бријаторе е уверен дека, ако му дадат вистинска машина, Алонсо може да го надмине рекордот на Шумахер по бројот на освоени титули.

„Се надевам на тоа, бидејќи Фернандо заслужува да биде најдобриот возач во историјата. Тој реши да остане во Ферари до крајот на својата кариера и се надевам дека Ферари може да му испорача болид со кој ќе освои повеќе титули од Шумахер“, вели Италијанецот.