Фудбалски вести
За Весли Снајдер 250.000 евра неделна плата на Роналдо не се проблем, но тврди дека се проблем за неговите соиграчи
Играчите на Реал Мадрид не го сакаат Роналдо...
Играчите на Реал Мадрид не се многу среќни по изјавите на нивниот претседател Рајмон Клдерон дека Кристијано Роналдо е многу блиску до „Сантјаго Бернабе“. Една од ѕвездите на тимот, Весли Снајдер, посочи дека не е многу пријатно за останатите фудбалери кога ќе слушнат дека доаѓа нов играч, чија плата ќе биде неколку пати повисока од нивната.
„Вистина е дека имаше потреси во соблекувалната. Лично не ме загрижува што Роналдо ќе добива по 250.000 евра неделно, но знам дека другите играчи тоа не го сакаат. Не сакам многу да коментирам, бидејќи секој ден доѓаат различни информации. Роналдо е одличен фудбалер и секако дека е добредојден“, изјави Холанѓанецот, кој очигледно куртоазно му порача на Роналдо дека вратите му се отворени затоа што во следната реченица кажа дека на „кралевите“ во моментов не им се потребни засилувања:
„Во тимот имаме слични играчи како што се Робен и Робињо. На овој тим му е потребна стабилност. Не би го фалел претерано Роналдо затоа што така би бил некоректен кон соиграчите. Мислам дека Реал М. не мора да донесе некој нов фудбалер“, смета Снајдер.
Ето потпишува со узбекистанскиот Курувчи за неколку месеци
Камерунскиот напаѓач на Барселона, Самуел Ето, ќе потпише договор за неколу месеци со узбекистанскиот Курувчи, соопшти официјалниот сајт на клубот.
Ето вчера допатува во Ташкент, а договорот треба да биде потпишан денеска. Основната цел на Курувчи е да ги осигура услугите на Ето за Лигата на шампиони во Азија, по што Камерунецот ќе биде повторно слободен играч. Засега не е објавена сумата, но некои медиуми шпекулираат дека трансферот чини неверојатни 40 милиони евра. Тренерот на Барселона Гвардиола итно побара нов напаѓач, а ќе се цели на Дрогба, Адебајор, Кануте или Виља.
Хлеб: Дојдов во Барса за да освојувам титули
Новото засилување на Барселона Белорусинот Александар Хлеб (дојде од Арсенал за 15 милиоини евра) по официјалното претставување пред навивачите изјави дека дошол на „Ноу камп“ за да освојува титули. „Пресреќен сум затоа што реализирав еден сон. Сакам да освојувам титули, затоа сум тука. Можам да играм на неколку позиции, но Гвардиола ќе одлучи како ќе ме користи“, порача Хлеб.
Аршавин: Не сум сигурен дали сега Барса има пари за мене
Андреј Аршавин се' уште се надева кариерата да ја продолжи во Барселона, но не е сигурен дали Каталонците во моментов имаат пари, ако се земе предвид ангажирањето на Хлеб.
„Не сум сигурен дека и натаму ме сакаат откако го донесоа Хлеб. Јас лично се надевам дека ќе ме земат, но Зенит бара многу пари. Колку што слушнав ,Барса понудила 15 милиони, но мојот клуб бара 30. Тоа е се' што знам“, изјави 27- годишниот руски репрезентативец.
Фановите на Јуве не го ставија Дел Пјеро во идеалниот состав
Фановите на Јувентус го изгласаа идеалниот состав за наредната сезона, а во него ја нема легендата Алесандро дел Пјеро. Во одбраната се Киелини, Легротаље, Де Кегле и Григера, во средината се Сисоко, Кристијан Занети (доби предност во однос на новото засилување Поулсен), на крилните позиции се Каморанези и Недвед, а во нападот Трезеге и Амаури.
Пабло Аимар потпиша за Бенфика
Аргентинскиот играч од средниот ред Пабло Аимар (30) денеска потпиша договор со Бенфика на четири години. Вредноста на трансферот на Аргентинецот е 7,5 милиони евра, а интересно во Бенфика Аимар ќе ја обнови соработката со Кике Флорес, тренерот со кого мина пет години во Валенсија.
Динамо стартуваше со победа во ЛШ
Во првиот меч од квалификациите за Лигата на шампиони Динамо Загреб со тотално реновиран состав го совлада на гостувањето Линфилд од Северна Ирска. Својата надмоќ во Белфаст Хрватите ја крунисаа со чисти 2:0 (Манџукиќ 19 минута и Дрпиќ 90) и сега мирни влегуваат во реваншот.
На тимот од Северна Ирска кој е практично група од професионалци и аматери најголемата цел му беше да загуби со што помала разлика од далеку поквалитетниот противник.
Резултати од останатите натпревари: Динамо Тбилиси - Рунавик 3:0, Актобе Ленто - Шериф 1:0, Дрогеда - Левадија 2:1, Линфилд - Динамо Загреб 0:2. |
