ФИФА бара потврда на саатницата за дуелите со Холандија и со Шкотска
Саатницата зависи од рефлекторите
Емил Китановски
Светската фудбалска асоцијација (ФИФА) испрати допис до фудбалската федерација на Македонија (ФФМ) со кој од нашите надлежни структури, најдоцна до понеделник 21 јули, бара потврда на терминот или поточно речено сатницата, во која ќе се одиграат квалификациските дуели против соответните состави на Шкотска и Холандија кои се на програмата на 6 односно 10 септември на Градскиот стадион во Скопје. Да потсетиме, откако поради тековните градежни работи на Градскиот стадион во Скопје беа симнати сите дилеми и препреки и УЕФА даде согласност нашиот единствен репрезентативен фудбалски објект во земјава да им биде домаќин на селекциите на Шкотска и Холандија во септемврискиот квалификациски циклус, на ред дојде ФИФА, која се интересира дали на сила останува веќе понудената сатница 17.30 часот, или доколку тоа го дозволуваат техничките можности (на Градскиот стадион во Скопје да бидат поставени привремени рефлектори кои ги задоволуваат стандардите на ФИФА), мечот сепак ќе се одигра во ноќен термин, а тоа значи со почеток во 20.30 часот.
Во текот на вчерашниот ден надлежните од ФФМ стапија во контакт со сопственикот на ТВ правата на фудбалската репрезентација германскиот концерн Спорт 5, и добија ветување дека рокот кој го постави ФИФА ќе биде испочитуван.
Од канцеларијата на ФФМ пак до ФИФА вчера беше дефиниран и испратен привремениот термин, а тоа е 17.30 часот, времето кое челниците на ФФМ првично го предвидоа како сатница за одигрување на двете средби со Шкотска и Холандија.
Во меѓувреме надлежните лица на Спорт 5 треба да изготват елаборат во кој ќе ја потврдат или демантираат техничката можноста за поставување на привремени рефлектори на Градски. Доколку Спорт 5 даде писмена гаранција дека тие како сопственици на ТВ правата во преостанатиот рок можат да стигнат со поставувањето на рефлекторите, ФФМ ќе го извести Јавното претпријатие за можноста и ќе побара согласност за техничко изведување на работите на репрезентативниот стадион. Барем засега, од Спорт 5 пристигнуваат позитивни сигнали околу можноста за поставување на привремени рефлектори на Градски. |
