Братислав Ташковски го доби Рациновото признание

Добитник на годинешното почесно Рациново признание е Жана Ангеловска, пензиониран професор по француски јазик

ВЕЛЕС - Братислав Ташковски за романот „Кафез од гревови“ е годинешниот добитник на Рациновото признание.

Жири-комисијата, во состав Трајче Кацаров, Маја Јакимовска-Тошиќ и Светлана Христова-Јоциќ, му ја додели наградата на Ташковски поради тоа што тој со својата пишувачка вештина ја пласира тезата за ликот на Иван Источни, посветен духовник и бунтовен револуционер.

„Преку ликот на Иван Источни, посветен духовник и бунтовен револуционер, е претставена драмата на неговата потрага по сопствената верба. Ваквите пребарувања му ја даваат на главниот лик димензијата на активист, револуционер и бунтовник со крст и оружје. Приказната преку реалните историски случувања кога македонското прашање се затвораше преку најсуров начин, на поделби, жртви и искушенија, ликот на Иван Источни ги собираше во кафезот на неговите лични чувства и сознанија“ - ја образложи доделената награда, д-р Маја Јакимовска Тошиќ.

За авторот наградата е големо признание. „Оваа награда е големо признание за мене, благодарам на жирито што се одлучи моето дело да биде годинашниот лауреат. Мојот јунак Иван Источни раскажува за најтемниот дел во поновата историја на македонскиот народ, од почетокот на 19 век до почетокот на Првата светска војна. Тоа е проколнат период недоволно истражен, време на себепронаоѓање кога сите не' делат, присвојуваат.

„Кафез од гревови“ е втора книга од трилогијата „Македонка“, последната се очекува да излезе наскоро. Добитник на годинешното почесно Рациново признание е Жана Ангеловска, пензиониран професор по француски јазик од Филолошкиот факултет во Скопје поради огромен придонес во афирмацијата на македонската литература во Франција. Годинешните 47. Рацинови средби ќе се одржат на 10 и на 11 јуни во Велес. (С.Ќ.Н.)