Поглед

Досетливи Грци

Нина Нинеска-Фиданоска

Интересни некои Грци. Малку им беше што со години бесрамно ја мамеле Европа за своите финансиски дупки и без трошка грижа таложеле долгови до бескрај. Малку им беше што земјите од еврозоната и ММФ ги закрпија со 110 милијарди евра за да се спасат од банкрот. И, конечно, малку им беше што и после се' сите им ги простија гревовите и решија да им дадат уште една шанса. Ни тоа не беше доволно за досетливите Грци.

Тие деновиве уште еднаш ја покажаа својата максимална креативност во обидите тешкиот финансиски товар да го префрлат врз некој друг, место да го стегнат ременот и најпосле да почнат да штедат, на што веројатно не помислувале никогаш досега. А и зошто тие да се малтретираат и да се откажат од разуздано арчење од 13. и од 14. плата и од другите задоволства што досега си ги дозволувале?

Најновата грчка генијалност е одлуката на нивната влада на камионите и автобусите да им се дозволува влез во земјата само со 200 литри нафта, а над овој лимит ќе се плаќаат казни по половина евро за секој литар!!! И тоа ќе важело за транспортерите од сите земји. Поздрави за идејата, многу е мудра, нема што. И други држави досега посегнале по вакви мерки во тешки моменти. Ем странските камионџии ќе мора да купуваат од грчкото изгор скапо гориво и таму да ги оставаат своите пари, ем преку високите ДДВ и акциза ќе го полнат отворениот кратер од грчки буџет.

Тоа што транспортерите ќе книжат огромни загуби и што ќе ризикуваат во потрага по нивната сега дефицитарна нафта дури и да останат на улица натоварени со стока, речиси воопшто не ги засега грчките авторитети. Кај и да е, можеби ќе донесат одлука и да им оставаме по 100 евра на граница за да се спасат од кризата. Е, па и ако е од Грците, многу е.