Македонија ја нема во заклучоците за самитот

Во Брисел, но и во амбасадите во земјата внимателно ги следат случувањата на политичката сцена во Македонија

Македонија ја нема во заклучоците за самитот на ЕУ на 17 јуни, се дознава официјално од извори во Брисел. Во делот за Западен Балкан засега се дискутираат само конференцијата во Сараево, состојбата во Албанија и статусот на Србија во однос на Унијата, а последна шанса Македонија да се најде на агендата ќе биде на министерско ниво, ако воопшто се отвори како тема.

Според процени од Брисел, иако заклучокот од минатиот самит ги обврзува лидерите да се навратат на нашето прашање, сепак, реално нема што да се каже или да се заклучи за препораката на ЕК за почнување преговори за членство. Затоа, Македонија неделава не се ни дискутира на ниво на амбасадорите во ЕУ и во завршниот документ нема ниту збор за тоа.

Во Брисел, но и во амбасадите во земјата внимателно ги следат случувањата на политичката сцена во Македонија и, според еден дипломат, со загриженост ја чекаат прославата на годишнината на ВМРО-ДПМНЕ поради страв дека премиерот Никола Груевски ќе ги повтори пораките од прославата на младите сили, кои наидоа на критики и осуда. „Сите амбасади внимателно го читаа и анализираа говорот на Груевски“, тврди дипломатот, сугерирајќи очигледно дека тој е главна тема во дипломатските кругови. Ако премиерот ги повтори главните пораки од прославата што, според овој дипломат, биле вознемирувачки, тоа ќе биде лош сигнал до Унијата и до земјите-членки, бидејќи нема да има сомневање дека е зацртана политика на лидерот на ВМРО-ДПМНЕ, а не инцидентен настап, оценува тој. (С.Ј.)