Баросо чека добра вест од Груевски

Прва средба на премиерот со шефот на Европската комисија

Од нашиот дописник
Слободанка Јовановска

Брисел - Претседателот на Европската комисија, Жозе Мануел Баросо, денес првпат ќе се сретне со премиерот Никола Груевски, а фактот дека во пренатрупаната агенда оддели половина час за нашиот премиер значи дека очекува да биде сфатен и награден со добра вест од Македонија.

Баросо на разговори со Груевски доаѓа практично од Пекинг, каде што изминатите денови беше во работна посета и заедно со Рен се подготвени повеќе да слушаат, но и да упатат неколку пораки. Според она што се дознава од ЕУ, Баросо сака успешен прв самит со Лисабонскиот договор, па добрата вест од нашиот премиер би му помогнала да дојде до таа цел.

„Фактот дека во овој период, кога сака успешен самит, Баросо најде термин во календарот да го прими вашиот премиер треба да значи дека очекува Груевски да му даде нешто корисно“, порачуваат извори од Брисел. Според нив, ќе биде целосно неразбирливо за Баросо и за Рен доколку двајцата лидери и премиери не ја искористат можноста што е пред нив околу датумот за преговори и решавањето на спорот за името. Се надеваме дека двајцата ќе ја преземат одговорноста, порачуваат тие , јасно посочувајќи дека од Груевски се чека добра вест, но и добра волја од Јоргос Папандреу.

Овде ја отфрлаат можноста со Лисабонскиот договор да се смени нешто во процедурата околу донесувањето на одлуката за Македонија со зборовите „заборавете на тоа, ништо нема да се случи различно отколку досега“.

Премиерот Груевски ќе се сретне со Баросо и со Рен попладнето, по што ќе имаат заедничка прес-конференција. Претходно Груевски ќе учествува на европски молитвен појадок, а од Брисел ќе замине во посета на Финска. Речиси редовно правило е македонскиот премиер да ги остварува средбите во Брисел во четири очи, па се очекува оваа да биде во тој манир, иако овојпат, всушност, е во шест очи.