Мoe ќоше

Гудбај, Америка

Ерол Ризаов

Стејт департментот нарача пролетно будење во Македонија

Некој нарачал тревога за општа опасност во Македонија. Сирените пиштат, избезумен му вртам телефон на претседателот на државата Ѓорге Иванов. Ми вели не ми го троши бадијала роамингот јас садам дрво во Торонто, тука сум со нашинците, а до мене има и еден локален функционер од општината. Не ги вознемирувај граѓаните, нема никаква опасност за татковината. Се' е под контрола. Тоа што слушаш завивање на сирени не е тревога, тоа Америка ни' нарача будење, ми објасни набрзинка претседателот ни. Како што сум шубелија, веднаш му вртам на премиерот Никола Груевски. Не ни чека да го допрашам, вели јас сум во Аргентина на лов, не кревај паника, нормално е Србија пред нас да ги почне преговорите за влез во ЕУ и во НАТО. За тоа платија со територија речиси колку Македонија. Што ловите премиере го прашувам со олеснување. Капиталци, ми вели, фаќам богаташи, милијардери, разни други инвеститори кои ќе вложуваат големи пари во Македонија. Исто како што го фатив оној Субрата во Индија и Слим од Мексико. Затоа ќе скокнам до Бразил. Ама, пред Велигден сум дома. Бидете без гајле.

Чекај си велам да му свртам на Трајко Вељаноски, тој ќе знае да ми објасни човекот е ептен верзиран за вонредни и деликатни ситуации, особено кога има голема опасност. Каква узбуна човече, какви алармантни извештаи. Не ме вади од памет. Јас сум на Кипар, најизворно се запознавам со повеќе начини како да се реши економската криза, како се земаат пари од банките и од граѓаните без задолжување и како да се полни државната каса. Има повеќе варијанти да се убедат пратениците да не прават пречки при носење на Буџет. Мојата дискусија на оваа тема со лични искуства беше одлично примена. Добив силен аплауз. Америка, каква Америка, ми вели Вељаноски, нивниот Извештај е за лани. Кој сега ќе прави празни муабети за ланскиот снег. Американците доцнат. Ние сме многу понапред со таа фаза. Во ек се преговори за формирање Комисија за да се испита случајот. Оваа година ќе ја завршиме таа работа.Така што и догодина нивниот извештај ќе биде за лани. Постојано тој извештај е бајат.

Конечно ми текна. Чекај јас да си го прашам заменикот премиер и министер за финансии Зоран Ставрески, што сакаат америте од нас, што вака не' потресуваат. Зоран вели, јас сум во Вашингтон со гувернерот Богов. Ете си викам што е прав човек на право место. Во Вашингтон, ќе биде, ами каде. Им лепна ли во лице на Американците што не' плашат тука дека ни е лоша состојбата, прашувам. Нам состојбата ни' е како во рајот, ним не им чини изгледа работата. Ние сме нискозадолжени, а тие се најзадолжени во светот, ги цитирам домашните експерти и премиерот. Полека, ми вели Ставрески, не сум дојден за тоа, тука сум да ги подучам овие од ММФ како со нивни пари се добиваат избори. Додуша знаеја како направивме голем потег кога 2011 година во буџетот уфрливме 230 милиони евра пред избори. Тие пари ни ги дадоа што се вели за зорт заман. А, има ли поголем зорт од тоа да не се изгубат изборите. И сега така си правиме редовно пред секои избори. Уфрламе по неколку стотки во милиони евра заем во буџетот, ќе платиме се' што треба и кај треба и нормално победата е наша.Чудо прават парите, ако има паметна власт.

Си викам и овој ме вози, дај да му се јавам на Никола Попоски, министер за надворешни работи, фин човек, башка тој е близок со Американците ќе ми каже од прва рака. Вели, јас сум во Женева, водиме една многу стручна расправа за безбедност, колку ангели можат да застанат на врвот на една игла. Престанав да sвонам. Ме фати паника. Ако и министерката за внатрешни работи Гордана Јанкулоска не е тука, си реков, отиде државата. Па ова ти било општа бежанија, никој од државниот врв не е дома. Сите се разбегале. Таман помислив дека тоа и не е така лошо, кога ми звони Гордана, лично. Вели џабе се радуваш. Погрешен ти е заклучокот. Тоа што го помисли не е доказ дека на Македонија не и треба раководство, туку дека толку е стабилен системот што функционира и без нив. Вџашен што знае што мислам, се вадам, ама останавме обезглавени, никој нема дома, од што толку се уплашија. Како никој нема, па јас сум тука, тука е и Али Ахмети, а и Талат Џафери само што се врати од Косово. Тоа е доволно за здрави и стабилни системи.

Нема друго чаре му вртам на Обама. Му велам како можевте претседателе на светот толку да не' оцрните. Никогаш немало полош Извештај за Македонија. Претеравте. Велите има корупција во Владата, тврдите дека не се почитуваат законите, нема правна држава, се крши Уставот, во парламентот се тепаат пратеници на опозицијата, велите, дека и судовите и полицијата ги кршат законите, дека селективно се гонат само политичките противници, тврдите дека за никаде била работата со медиумите, биле целосно под контрола на власта, ��ека имало цензура и самоцензура, имало меѓуетничка напнатост и дискриминација, дека Владата ја користи лустрацијата за напад врз политички неистомисленици, велите дека Македонија не е демократска земја. Па, и ако е и од вас многу е, што мислите вие.

Обама возвраќа, кажете што не е точно дали нашиот Извештај, или вам ви е за никаде работата. Е, па сега господин Обама ќе видите вие што е слободно и критичко новинарство кога ќе ве подберат нашите храбри перјаници за заштита на ликот и делото на Владата и лично на водачот Никола Груевски. Ќе зажалите што воопшто сте ја спомнале во тие ваши извештаи Македонија. Вие ли ќе ни кажувате нам што е демократија, а што им направивте на Индијанците и на црнците. Ќе ве прашаат утре нашите патриоти.

Е, па драги мои што да ви кажам. Сам треба да си одработам, кога фатиле сите магла. Работата е збогум Америка, добро утро Македонијо, разбуди се. Тоа би бил најкусиот мој коментар по последниот Извештај на Стејт департментот за човековите права во Македонија.