(ФОТО) Жолтата куќа на ВМРО ќе стане осумкатна зграда

Вработените се преселија, а извадените прозорци и камионите што се паркираат пред објектот укажуваат на зафати за нова репрезентативна зграда

ФОТО: Петр Стојановски

Ги снема раззелените дрвја пред централното седиште на ВМРО-ДПМНЕ, а ја снема и партијата од познатата „жолта куќа“. Вработените се преселија на друга локација, прозорците од зградата се извадени, а пред објектот на „Технометал Вардар“ се паркираа камиони. Ангажираните работници се активираа за изградба на нова репрезентативна административна зграда.

Од ВМРО-ДПМНЕ велат дека реновирањето и проширувањето на зградата не��а да ја чини ништо партијата, бидејќи таков договор склучиле со инвеститорот. Досега од владејачката партија молчеа за изгледот, начинот на реализација на новиот објект, но денеска, конечно, соопштија дека зелено светло за реновирање на седиштето било дадено уште ланскиот јули, на седницата на Извршниот комитет. Еден месец подоцна, предлогот бил прифатен и од Централниот комитет на партијата. 

„Тоа земјиште се гради во соинвеститорство, односно понудувачите понудија процент од развиената бруто-површина што ќе му го отстапат на сопственикот на градежното земјиште (во случајов ВМРО-ДПМНЕ), што воедно беше еден од основните критериуми за избор на најповолен понудувач. Тоа ќе биде најмалку 30 проценти од развиената бруто-површина“, се вели во соопштението на ВМРО-ДПМНЕ, во кое се потенцира дека приватен инвеститор го гради земјиштето во сопственост на ВМРО-ДПМНЕ за свои комерцијални цели, а за возврат треба да отстапи најмалку 30 отсто од корисната изградена површина на партијата, што значи дека партијата нема никакви трошоци за објектот.

Ваквата одлука била донесена поради старата и дотраена повеќедецениска зграда и повеќекратните трошоци за нејзиното одржување. Единствено не кажуваат каде ќе престојуваат вработените додека траат градежните зафати.

Од ВМРО-ДПМНЕ информираа дека понудувачот треба да достави банкарска гаранција од 200.000 евра, која би се активирала доколку инвеститорот ненавремено и неквалитетно ја заврши градбата. Инвеститорот треба да изгради подземно паркирање на минимум две нивоа. Максималната дозволена висина на зградата е 29 метри, ќе има приземје, осум ката плус потпокрив. Инвеститорот на своја сметка на градежната парцела треба да изгради и два посебни дела на предвидениот објект, со посебни влезови и по изградбата, на сопственикот на земјиштето да му отстапи еден дел од објектот, кој ќе претставува посебна функционална целина. (Б.Ш.)